شاہ محمود و دیگر رہنماؤں کی پیرول پر رہائی کیلئے وزیراعظم کو خط

خط میں زور دیا گیا کہ اڈیالہ جیل سے باہر موجود سینئر پارٹی قیادت ہی مذاکرات کے آغاز اور تسلسل میں مؤثر کردار ادا کر سکتی ہے

اسلام آباد: پاکستان تحریک انصاف (پی ٹی آئی) کے سابق رہنماؤں کے ایک گروپ نے وزیر اعظم شہباز شریف سے کوٹ لکھپت جیل میں قید سینئر پارٹی رہنماؤں کو پیرول پر رہا کرنے کا مطالبہ کر دیا ہے۔ اس اقدام کا مقصد ملک میں سیاسی مفاہمت اور مذاکرات کے عمل کو فروغ دینا بتایا گیا ہے۔

سابق رہنماؤں نے 23 دسمبر کو وزیر اعظم کو ارسال کیے گئے خط میں کہا کہ قید رہنماؤں کی رہائی مجوزہ مذاکرات کی قیادت، ساکھ اور نتیجہ خیزی کے لیے ضروری ہے۔ خط میں زور دیا گیا کہ اڈیالہ جیل سے باہر موجود سینئر پارٹی قیادت ہی مذاکرات کے آغاز اور تسلسل میں مؤثر کردار ادا کر سکتی ہے، جبکہ پی ٹی آئی کے بانی عمران خان کا ذکر شامل نہیں کیا گیا۔

خط میں یہ بھی بتایا گیا کہ قید رہنماؤں میں شاہ محمود قریشی، ڈاکٹر یاسمین راشد، عمر سرفراز چیمہ، میاں محمود الرشید اور سابق سینیٹر اعجاز چوہدری شامل ہیں۔ کمیٹی کا کہنا ہے کہ ان رہنماؤں کو پیرول پر رہا کیا جائے تاکہ وہ مذاکراتی عمل میں مؤثر انداز میں حصہ لے سکیں۔

نیشنل ڈائیلاگ کمیٹی نے تمام سیاسی جماعتوں سے اپیل کی ہے کہ وہ ذاتی اور سیاسی مفادات سے بالا تر ہو کر میثاق جمہوریت اور میثاق معیشت پر اتفاق رائے کے لیے کردار ادا کریں، تاکہ ملک میں طویل مدتی سیاسی استحکام اور معاشی بحالی ممکن ہو سکے۔

خط پر سابق رہنماؤں محمود مولوی، عمران اسمٰعیل اور فواد چوہدری نے دستخط کیے ہیں، جنہوں نے حکومت اور پی ٹی آئی کے درمیان مذاکرات کی راہ ہموار کرنے کے لیے نیشنل ڈائیلاگ کمیٹی تشکیل دی تھی۔