وزیراعلیٰ پنجاب کی ہدایت،الحمراء کے مسیحی ملازمین کو ایک تنخواہ بونس

لاہور: وزیراعلیٰ پنجاب مریم نواز شریف کی ہدایت پر لاہور آرٹس کونسل (الحمراء) کے مسیحی ملازمین کو ایک تنخواہ بونس دینے کا اعلان کیا گیا۔ یہ موقع الحمراء میں کرسمس کی تقریب کے دوران سامنے آیا، جس میں صوبائی وزیر اطلاعات و ثقافت پنجاب عظمیٰ بخاری بطور مہمان خصوصی اور پارلیمانی سیکرٹری اطلاعات و ثقافت شازیہ رضوان بھی موجود تھیں۔

وزیر اطلاعات پنجاب عظمیٰ بخاری نے مسیحی ملازمین سے ملاقات کی اور انہیں کرسمس کی مبارکباد دی، ساتھ ہی وزیر اعلیٰ کی جانب سے تحائف بھی تقسیم کیے۔ انہوں نے مسیحی ملازمین کے ہمراہ کرسمس کا کیک کاٹا۔ چیئرمین الحمراء رضی احمد اور ایگزیکٹو ڈائریکٹر الحمراء محمد نواز گوندل بھی تقریب میں موجود تھے۔

عظمیٰ بخاری نے کہا کہ کرسمس کے تہوار پر مسیحی بہن بھائیوں کی خوشیوں میں برابر کے شریک ہیں اور اقلیتیں وزیر اعلیٰ پنجاب کے دل کے بہت قریب ہیں۔ انہوں نے مزید کہا کہ مسیحی ملازمین پنجاب کے فخر ہیں اور ان کی خدمات قابل ستائش ہیں۔ وزیر اطلاعات نے یقین دلایا کہ پنجاب حکومت اقلیتوں کے تحفظ اور فلاح کے لیے تمام ممکن وسائل بروئے کار لا رہی ہے اور کرسمس محبت، امن اور ہم آہنگی کا مظہر ہے۔