بین الاقوامی اسلامی یونیورسٹی کے اندر تیندوا داخل ہو گیا

بین الاقوامی اسلامی یونیورسٹی اسلام آباد کے کیمپس میں مبینہ طور پر تیندوے کی موجودگی کی اطلاعات سامنے آئی ہیں، جس کے بعد طلبہ میں خوف و ہراس پھیل گیا۔ ذرائع کے مطابق تیندوا یونیورسٹی کے اندر جھاڑیوں میں دیکھا گیا، جس پر یونیورسٹی انتظامیہ نے فوری طور پر وائلڈ لائف اور پولیس حکام کو اطلاع دے دی۔

انتظامیہ کی جانب سے ہاسٹلز میں مقیم طلبہ کو جنگلاتی علاقوں میں جانے سے گریز کرنے کی ہدایت جاری کی گئی ہے، جبکہ کیمپس میں سیکیورٹی اور نگرانی مزید بڑھا دی گئی ہے۔

ترجمان بین الاقوامی اسلامی یونیورسٹی کے مطابق کیمپس میں مبینہ چیتے کی اطلاع پر تصدیقی عمل جاری ہے اور سوشل میڈیا پر وائرل ویڈیوز کی صداقت جانچی جا رہی ہے۔ ترجمان کا کہنا ہے کہ تاحال تیندوے کی موجودگی کی کوئی حتمی تصدیق نہیں ہوئی، تاہم طلبہ کی حفاظت اولین ترجیح ہے، اسی لیے متعلقہ اداروں کو الرٹ کر دیا گیا ہے۔ طلبہ کو غیر مصدقہ اطلاعات پھیلانے سے گریز کی ہدایت بھی کی گئی ہے۔

دوسری جانب اسلام آباد وائلڈ لائف مینجمنٹ بورڈ کے حکام کا کہنا ہے کہ یونیورسٹی میں تیندوے کی اطلاع کا جائزہ لیا جا رہا ہے۔ حکام کے مطابق تیندوا مارگلہ ہلز نیشنل پارک کے قدرتی حیات میں شامل ہے اور رات کے اوقات میں اپنے مسکن کے لحاظ سے 20 سے 30 مربع کلومیٹر تک حرکت کر سکتا ہے۔

وائلڈ لائف حکام نے مزید کہا کہ تیندوے انسانی موجودگی سے ہم آہنگ ہو چکے ہیں، اس لیے شہریوں کو بھی ذمہ دارانہ رویہ اختیار کرنا چاہیے۔ صورتحال کی مکمل نگرانی کی جا رہی ہے۔