یومِ قائد پر آئی ایس پی آر کا نیا ملی نغمہ ’’پیغامِ قائد‘‘ جاری

یومِ قائد کے موقع پر پاک فوج کے شعبہ تعلقاتِ عامہ (آئی ایس پی آر) نے بانیٔ پاکستان قائداعظم محمد علی جناحؒ کو خراجِ عقیدت پیش کرتے ہوئے نیا ملی نغمہ ’’پیغامِ قائد‘‘ جاری کیا ہے۔

یہ نغمہ قائداعظمؒ کے فرمودات، قیامِ پاکستان کے لیے دی جانے والی قربانیوں اور تاریخی جدوجہد کی عکاسی کرتا ہے۔ نغمے میں دشمنوں کے عزائم کے مقابلے میں قومی استقامت اور عزم کو اجاگر کیا گیا ہے۔

آئی ایس پی آر کے مطابق ’’پیغامِ قائد‘‘ میں قائداعظمؒ کی قائدانہ صلاحیتوں کو بہترین الفاظ میں خراجِ عقیدت پیش کیا گیا ہے اور یہ نغمہ پاکستان کے محفوظ و باوقار مستقبل کی تجدید اور بابائے قوم سے قوم کی والہانہ محبت کا مظہر ہے۔

یومِ قائد کے موقع پر جاری یہ نغمہ قوم کو قائداعظم کے افکار اور اصولوں سے روشناس کرانے کے ساتھ ان کے نظریات کی ترویج کا بھی ذریعہ ہے۔