قلات: سکیورٹی فورسز کا انٹیلی جنس بیسڈ آپریشن، 8 بھارتی حمایت یافتہ دہشت گرد ہلاک

بلوچستان کے ضلع قلات میں سکیورٹی فورسز نے فتنۃ الہندوستان کے خلاف کامیاب انٹیلی جنس بیسڈ آپریشن کرتے ہوئے 8 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق 24 دسمبر کو سکیورٹی فورسز نے بھارتی پراکسی فتنۃ الہندوستان سے تعلق رکھنے والے دہشت گردوں کی موجودگی کی اطلاع پر قلات میں کارروائی کی۔ آپریشن کے دوران دہشت گردوں کے ٹھکانے کو مؤثر انداز میں نشانہ بنایا گیا اور شدید فائرنگ کے تبادلے کے بعد 8 بھارتی حمایت یافتہ دہشت گرد مارے گئے۔

ترجمان پاک فوج کے مطابق ہلاک دہشت گردوں کے قبضے سے اسلحہ، گولہ بارود اور دھماکا خیز مواد برآمد ہوا، جو علاقے میں متعدد دہشت گردانہ کارروائیوں میں استعمال ہو رہا تھا۔ آئی ایس پی آر کا کہنا ہے کہ علاقے میں کسی بھی دیگر بھارتی سرپرستی میں سرگرم دہشت گرد کی موجودگی کے خاتمے کے لیے کلیئرنس اور سرچ آپریشنز جاری ہیں۔

آئی ایس پی آر کے مطابق قومی ایکشن پلان کے تحت وفاقی ایپکس کمیٹی سے منظور شدہ وژن ’’عزمِ استحکام‘‘ کے مطابق سکیورٹی فورسز اور قانون نافذ کرنے والے ادارے غیر ملکی سرپرستی میں ہونے والی دہشت گردی کے مکمل خاتمے تک انسداد دہشت گردی مہم جاری رکھیں گے۔

وزیراعظم شہباز شریف اور وفاقی وزیر داخلہ محسن نقوی نے قلات میں فتنۃ الہندوستان کے دہشت گردوں کے خلاف کامیاب کارروائی پر سکیورٹی فورسز کو خراج تحسین پیش کیا۔ وزیراعظم نے کہا کہ عزمِ استحکام کے وژن کے تحت سکیورٹی فورسز دہشت گردی کے خلاف نمایاں کامیابیاں حاصل کر رہی ہیں اور پوری قوم اس جنگ میں اپنی افواج کے ساتھ کھڑی ہے۔

وفاقی وزیر داخلہ محسن نقوی نے بھی 8 خوارجی دہشت گردوں کو ہلاک کرنے پر سکیورٹی فورسز کی پیشہ ورانہ صلاحیتوں کو سراہتے ہوئے کہا کہ بلوچستان میں فتنۃ الہندوستان کو کہیں چھپنے نہیں دیا جائے گا اور بھارتی سپانسرڈ دہشت گردوں کے مکمل خاتمے تک آپریشنز جاری رہیں گے۔