عظمیٰ بخاری کے بیان پر معاون خصوصی اطلاعات خیبرپختونخوا کا ردعمل

پنجاب کی وزیراطلاعات عظمیٰ بخاری کے بیان پر معاون خصوصی برائے اطلاعات نے ردعمل میں کہا ہے کہ پنجاب حکومت کی مہمان نوازی دیکھ لی، وزیر اعلیٰ سہیل آفریدی کا استقبال رکاوٹوں سے کیا گیا۔شفیع جان کا کہناتھاکہ والہانہ استقبال پر پنجاب کے عوام اور پارٹی کارکنوں کے مشکور ہیں، اداروں پر چڑھائی اور بیانات ن لیگ کا وطیرہ ہے، عظمیٰ بخاری نون لیگ کی سپریم کورٹ پر چڑھائی بھول گئی ہیں، تحریک انصاف پرامن اور جمہوریت پسند سیاسی جماعت ہے۔

مزید پڑھیں:سہیل آفریدی پاکستان کا یورپ دیکھنے لاہور آئے ہیں ، وزیراطلاعات پنجاب

معاون خصوصی خیبرپختونخوا نے کہاکہ پنجاب بھی ہمارا ہے، لاہور بھی ہمارا ہے،پنجاب نے تحریک انصاف کو مینڈیٹ دیا ہے مگر وہ چوری کر لیا گیا۔پنجاب میں چوری کئے گئے مینڈیٹ کو واپس لے کررہیں گے۔عوام کو ان کا جمہوری حق واپس دلائیں گے،قانون اور آئین کی بالا دستی یقینی بنائیں گے۔انہوں نے کہاکہ مریم صفدر کی جعلی حکومت نے پنجاب کے کسانوں کا برا حال کیا۔

شفیع جان نے کہا کہ مسلم لیگ ن کے دور میں پنجاب میں کرپشن کو فروغ ملا،بتیاں لگانے اور رنگ و روغن ترقی نہیں، پنجاب میں شعبہ صحت کا برا حال ہے، بانی چیئرمین عمران خان جعلی مقدمات میں قید ہیں لیکن تحریک انصاف پرامن ہے،بانی نے کارکنوں کو ہمیشہ پرامن رہنے اور قانون کے احترام کا درس دیا ہے ملک کے کسی بھی حصے میں کارکنوں کے پاس جانا اور ملاقاتیں کرنا ہمارا جمہوری اور آئینی حق ہے۔ وزیر اعلی سہیل آفریدی کی قیادت میں خیبرپختونخوا گورننس کا عالمی سطح پر اعتراف کیا جارہا ہے۔