شہید بینظیر بھٹو ایک عہد کا نام ہیں جو ہمیشہ زندہ رہے گا:محسن نقوی

وفاقی وزیرِ داخلہ محسن نقوی نے شہید محترمہ بینظیر بھٹو کے یومِ شہادت کے موقع پر انہیں خراجِ عقیدت پیش کرتے ہوئے کہا ہے کہ شہید بینظیر بھٹو ایک ایسے عہد کی علامت ہیں جو ہمیشہ قوم کی یادوں میں زندہ رہے گا۔

محسن نقوی نے اپنے پیغام میں کہا کہ شہید بے نظیر بھٹو کی قومی اور سیاسی خدمات کو کبھی فراموش نہیں کیا جا سکتا۔ ان کی شخصیت امید، استقامت اور جمہوریت سے غیرمتزلزل وابستگی کی عکاس تھی۔ انہوں نے کہا کہ شہید بے نظیر بھٹو کو عوام کی طاقت پر کامل یقین تھا اور انہوں نے ایک پرامن، ترقی پسند اور جمہوری پاکستان کے لیے اپنی جان کا نذرانہ پیش کیا۔

وفاقی وزیرِ داخلہ کا کہنا تھا کہ شہید بے نظیر بھٹو کا وژن آج بھی تمام جمہوری قوتوں کے لیے مشعلِ راہ ہے۔ وہ مزدور، کسان اور پسماندہ طبقات کو قومی ترقی کی بنیاد سمجھتی تھیں اور ایک ایسے پاکستان کا خواب رکھتی تھیں جہاں ہر شہری کی عزت و تکریم کو یقینی بنایا جائے اور جمہوری نظام مضبوط ہو۔

محسن نقوی نے مزید کہا کہ صدرِ مملکت آصف علی زرداری اور چیئرمین پاکستان پیپلز پارٹی بلاول بھٹو زرداری شہید بے نظیر بھٹو کی سیاسی میراث کو آگے بڑھا رہے ہیں۔ ان کے مطابق شہید بے نظیر بھٹو کا نظریہ آج بھی زندہ ہے اور آنے والے وقتوں میں بھی زندہ رہے گا۔