بارشوں کا نیاسلسلہ شروع ہونے کی پیش گوئی۔گلیات میں برف باری کا امکان

محکمہ موسمیات نے پیشگوئی کی ہے کہ آئندہ ہفتے ملک کے پہاڑی علاقوں میں بارش،تیز ہوائوں اورگرج چمک کے ساتھ برفباری کا امکان ہے ۔محکمہ موسمیات کے مطابق 29 دسمبرکی رات سے ایک مغربی ہوائی سلسلہ ملک کے مغربی حصوں میں داخل ہونے کا امکان ہے جو 30دسمبر کو مزید مضبوط ہوگا۔ یہ سلسلہ 31دسمبر کو بالائی اور وسطی علاقوں کے بیشتر حصوں کو اپنی لپیٹ میں لے لے گا اور 2جنوری 2026صبح تک بالائی علاقوں میں برقرار رہنے کا امکان ہے ،اس دوران مری کے گرد و نواح میں برفباری کا امکان ہے۔اس موسمی نظام کے زیر اثر پنجاب کے مختلف علاقوں میں بارش بھی متوقع ہے۔

پیش گوئی کے مطابق راولپنڈی، اسلام آباد اور خطہ پوٹھوہار میں تیز ہوائوںاور گرج چمک کے ساتھ بارش کا امکان ظاہر کیا گیا ہے، مری اور گلیات میں بارش اور برفباری ہو سکتی ہے۔محکمہ موسمیات کے مطابق برفباری کے باعث، مری اور گلیات میں بعض سڑکیں بند ہونے اور پھسلن کے باعث ٹریفک کی روانی متاثر ہونے کا خدشہ ہے۔ شہریوں اور بالخصوص سیاحوں سے اپیل کی گئی ہے کہ وہ غیر ضروری سفر سے گریز کریں اور اگر سفر ناگزیر ہو تو موسمی صورتحال کو مدنظر رکھتے ہوئے پیشگی معلومات حاصل کریں۔

عوام کو ہدایت کی گئی ہے کہ بارش اور برفباری کے دوران احتیاطی تدابیر اختیار کریں تاکہ کسی بھی ناخوشگوار واقعے سے بچا جا سکے۔