بھارت میں کرسمس پر توڑ پھوڑ،اقلیتوں پر ظلم انتہائی تشویشناک ہے،پاکستان

اسلام آباد: پاکستان کی وزارت خارجہ نے بھارت میں کرسمس کے موقع پر توڑ پھوڑ کے واقعات کی سخت مذمت کی ہے اور کہا ہے کہ بھارت میں اقلیتوں پر ظلم و ستم نہایت تشویشناک امر ہے۔

دفتر خارجہ کے ترجمان طاہر حسین اندرابی نے کہا کہ کرسمس کے موقع پر اقلیتوں کو نشانہ بنایا جانا ریاستی سرپرستی میں ہوا اور مسلمانوں کے گھروں کو بھی مسمار کیا گیا، جس سے مسلمانوں میں خوف اور بیگانگی کا احساس مزید بڑھ گیا ہے۔

ترجمان نے عالمی برادری سے اپیل کی کہ بھارت میں اقلیتوں کے بنیادی حقوق کے تحفظ کے لیے فوری اور مؤثر اقدامات کرے۔

بھارتی میڈیا رپورٹس کے مطابق 25 دسمبر کو مختلف علاقوں میں کرسمس کی تقریبات کو انتہا پسند عناصر کی جانب سے نشانہ بنایا گیا۔ آسام کے ضلع نلباڑی میں سینٹ میری سکول میں توڑ پھوڑ ہوئی، پانیگاؤں میں بجرنگ دل اور وشو ہندو پریشد سے منسلک افراد پر تشدد کے الزامات سامنے آئے، چھتیس گڑھ کے رائے پور میں میگنیٹو مال کی کرسمس سجاوٹ کو نقصان پہنچایا گیا، اور کیرالہ کے ضلع پالکّاڈ میں بچوں کے کرسمس کیرول گروپ پر حملے کی اطلاع ملی۔

ساؤتھ ایشیا ٹائمز کے مطابق بھارت میں گزشتہ برسوں میں مذہبی اقلیتوں، خصوصاً مسلم اور مسیحی برادری کے خلاف پرتشدد واقعات میں اضافہ ہوا ہے، جس کے بعد سوشل میڈیا پر اقلیتوں کے جان و مال کے تحفظ اور مذہبی آزادی کے حوالے سے تشویش بڑھ گئی ہے۔