پنجاب حکومت کی جانب سے کابینہ اراکین کو تشدد کا نشانہ بنایا گیا ،وزیراعلیٰ سہیل آفریدی

پشاور : وزیراعلیٰ خیبر پختونخوا سہیل آفریدی نے کہا ہے کہ پنجاب حکومت اخلاقی و ذہنی پستی کی شکار، رویہ غیر جمہوری اور قابل مذمت ہے ،پنجاب حکومت کی جانب سے کابینہ اراکین کو تشدد کا نشانہ بنایا گیا۔

صوبائی کابینہ اجلاس سے خطاب میں سہیل آفریدی نے پنجاب کے 3 روزہ دورے کے دوران صوبائی حکومت کے رویے پر سخت تحفظات کا اظہار کیا۔

خیبر پختونخوا کابینہ کے روبرو سہیل آفریدی نے کہا کہ پنجاب حکومت کا رویّہ غیرجمہوری اور قابل مذمت ہے، صوبائی حکومت نے کابینہ ارکان کو تشدد کا نشانہ بنایا ہے۔

انہوں نے کہا کہ ایک صوبے کے منتخب وزیراعلیٰ کےلیے مسلسل راستے اور بازاروں کو زبردستی بند کروایا گیا، پنجاب پولیس کی جانب سے موٹروے پر ریسٹ ایریاز بھی بند کروائے گئے۔

وزیراعلیٰ خیبر پختونخوا نے مزید کہا کہ مزار اقبال پر حاضری کے دوران لائٹس بند کروائے گئے، پنجاب حکومت اخلاقی اور ذہنی پستی کا شکار ہے۔

اُن کا کہنا تھا کہ ملک میں معاشی و سیاسی عدم استحکام کےدوران ایسا رویہ تشویشناک اور ناقابل فہم ہے، قومی یکجہتی کے وقت نفرت آمیز رویے ملک کےلیے نقصان دہ ہیں۔

سہیل آفریدی نے یہ بھی کہا کہ خیبر پختونخوا حکومت پنجاب حکومت کے اس رویے کی شدید مذمت کرتی ہے اور تمام سرکاری افسران کو واضح ہدایت دیتی ہے کہ وہ دیگر صوبوں سے آنے والے سرکاری وفود کی روایات اور استطاعت سے بڑھ کر خدمت کی جائے تاکہ  کسی کو اجنبیت محسوس نہ ہو۔

وزیراعلی نے وفاقی حکومت کی جانب سے اے آئی پی فنڈز کی عدم ادائیگی پر شدید اعتراض کرتے ہوئے کہ  فنڈز کی عدم ادائیگی کے باعث ضم اضلاع میں ترقیاتی منصوبوں پر پیشرفت متاثر ہو رہی ہے ،خیبر پختونخوا کے 4758 ارب روپے وفاق کے ذمے واجب ادا ہیں۔

سہیل آفریدی نے کہاکہ وفاقی وزارتِ خزانہ نے منگھڑت پروپیگنڈا کے ذریعے فسکل ریلیز سے متعلق میڈیا ٹرائل کی کوششیں کی،وفاقی حکومت تمام صوبوں کو دیے گئے فنڈز کی تفصیل بھی سامنے لائے،وزیراعلی نے خیبر پختونخوا اور دیگر صوبوں کے بقایاجات کا موازنہ کرنے کا بھی مطالبہ کیا۔

وزیراعلی نے بقایاجات کے حوالے سے تمام محکموں کو باضابطہ خطوط لکھنے اور تحریری جواب مانگنے کی ہدایت کی اور کہاکہ اگلے اجلاس میں بقایاجات سے متعلق تمام محکمے صوبائی کابینہ کو بریفنگ دیں۔

وزیراعلی نے جاری ترقیاتی منصوبوں پر کام تیز کرنے کا حکم، صحت اور تعلیم کو حکومتی ترجیحات قرار دیا گیا،بانی پی ٹی آئی کے وژن کے مطابق ہیلتھ اور ایجوکیشن صوبائی حکومت کی اولین ترجیح ہے۔