ملک کے مختلف حصوں میں بارش اور برفباری کی پیشگوئی

محکمہ موسمیات نے ملک کے مختلف حصوں میں بارش اور برفباری کی پیشگوئی کر دی ہے۔ محکمہ موسمیات کے مطابق آئندہ چند روز کے دوران موسم میں نمایاں تبدیلی کا امکان ہے۔

اسلام آباد میں موسم سرد اور مطلع ابر آلود رہنے کی توقع ہے، جبکہ پنجاب کے مختلف شہروں لاہور، گوجرانوالہ، گجرات، سیالکوٹ، نارووال، جھنگ اور شیخوپورہ میں بارش کا امکان ظاہر کیا گیا ہے۔ اسی طرح ساہیوال، فیصل آباد، شورکوٹ، ملتان، کوٹ ادو، بہاولنگر اور اوکاڑہ میں بھی بارش متوقع ہے۔

محکمہ موسمیات کے مطابق قصور، خانیوال، خانپور، بہاولپور اور رحیم یار خان میں دھند رہنے کا امکان ہے، جس کے باعث حدِ نگاہ متاثر ہو سکتی ہے۔

بلوچستان کے مختلف علاقوں کوئٹہ، زیارت، چمن، پشین، قلعہ عبداللہ، موسیٰ خیل، تربت، گوادر، جیوانی، لسبیلہ، قلعہ سیف اللہ، نوشکی، ژوب، قلات، بارکھان، کیچ، آواران، چاغی، پنجگور، خضدار، واشک اور خاران میں بارش کی پیشگوئی کی گئی ہے۔

سندھ کے اضلاع دادو، بینظیر آباد، قمبر شہداد کوٹ، نوشہرو فیروز اور جام شورو میں بارش کا امکان ہے، جبکہ سکھر، روہڑی، شکارپور، کشمور اور موہنجوداڑو میں دھند چھائے رہنے کی توقع ظاہر کی گئی ہے۔

خیبرپختونخوا کے علاقوں چترال، دیر، سوات، شانگلہ، کوہستان، بٹگرام، مانسہرہ، ایبٹ آباد، کرم، وزیرستان اور بنوں میں بارش کے ساتھ برفباری کا امکان ہے۔ اس کے علاوہ آزاد کشمیر اور گلگت بلتستان کے چند مقامات پر بھی بارش اور برفباری کی پیشگوئی کی گئی ہے۔