خارجیوں اور خوارج کیخلاف کسی قسم کی رعایت نہیں برتی جائے گی،محسن نقو ی

اسلام آباد: وفاقی وزیر داخلہ محسن نقوی نے کہا ہے کہ خارجیوں اور خوارج کے خلاف کسی قسم کی رعایت نہیں برتی جائے گی۔

یہ بات انہوں نے گورنر خیبرپختونخوا فیصل کریم کنڈی سے ملاقات کے دوران کہی، جس میں صوبے میں امن و امان کی صورتحال پر تفصیلی تبادلہ خیال کیا گیا۔ ملاقات میں خیبرپختونخوا کے سرحدی علاقوں میں سکیورٹی اقدامات اور خوارج کے خلاف جاری آپریشنز پر بھی گفتگو ہوئی۔

وزیر داخلہ محسن نقوی نے یقین دلایا کہ خیبرپختونخوا میں قیام امن وفاقی حکومت کی اولین ترجیح ہے اور دہشتگردی کے خلاف جنگ میں صوبے کے عوام کی قربانیوں کو قدر کی نگاہ سے دیکھا جاتا ہے۔ انہوں نے کہا کہ فتنہ الخوارج اور سہولت کاروں کے خاتمے کے لیے مشترکہ اقدامات جاری ہیں اور کسی قسم کی رعایت نہیں برتی جائے گی۔

گورنر خیبرپختونخوا نے کہا کہ صوبے میں امن و امان کے قیام کے لیے وفاقی تعاون ناگزیر ہے اور دہشتگردی کے خاتمے کے لیے مربوط اور مشترکہ اقدامات کی ضرورت ہے۔