اسحاق ڈار سے اقوامِ متحدہ میں پاکستان کے مستقل مندوب کی ملاقات

اسلام آباد: نائب وزیراعظم اور وزیر خارجہ محمد اسحاق ڈار سے اقوامِ متحدہ میں پاکستان کے مستقل مندوب عاصم افتخار نے ملاقات کی۔

ترجمان دفتر خارجہ کے مطابق ملاقات کے دوران عاصم افتخار نے وزیر خارجہ کو پاکستان مشن کی سرگرمیوں اور اقوامِ متحدہ میں پیش رفت کے حوالے سے بریفنگ دی۔

مستقل مندوب نے اقوامِ متحدہ کی سلامتی کونسل سمیت دیگر اداروں میں ہونے والی سرگرمیوں اور کثیرالجہتی فورمز پر پاکستان کی خارجہ پالیسی ترجیحات کو اجاگر کرنے پر بھی روشنی ڈالی۔

وزیر خارجہ اسحاق ڈار نے عالمی امن، سلامتی اور معاشی ترقی کے حصول کے لیے اقوامِ متحدہ اور کثیرالجہتی اداروں کی اہمیت پر زور دیا۔