خیبر پختونخوا،1 لاکھ 17 ہزار زیر التوا ڈرائیونگ لائسنس ایک ماہ میں مکمل کرنے کا حکم

وزیر اعلیٰ خیبر پختونخوا، سہیل آفریدی نے صوبے بھر میں زیر التوا 1 لاکھ 17 ہزار سے زائد ڈرائیونگ لائسنس کارڈز کی پرنٹنگ اور ترسیل کو ایک ماہ کے اندر مکمل کرنے کا حکم دے دیا ہے۔

محکمہ ٹرانسپورٹ خیبر پختونخوا نے ضلعی بنیادوں پر ڈرائیونگ لائسنس کارڈز کی پرنٹنگ اور ترسیل کا تفصیلی شیڈول جاری کر دیا ہے۔ حکام نے ہدایت کی ہے کہ مقررہ تاریخوں کے مطابق ڈرائیونگ لائسنس کارڈز کی فراہمی یقینی بنائی جائے۔

شیڈول کے مطابق:

• ہزارہ ڈویژن میں کارڈز جنوری 2026 کے پہلے ہفتے میں مکمل فراہم کیے جائیں گے۔
• مالاکنڈ ڈویژن (سوات، دیر، بونیر) میں ترسیل جنوری کے وسط تک مکمل ہوگی۔
• پشاور ڈویژن میں کارڈز 23 سے 26 جنوری تک فراہم کیے جائیں گے۔
• کوہاٹ ڈویژن میں ترسیل 29 جنوری تک متوقع ہے۔
• بنوں ڈویژن میں فراہمی 30 جنوری تک مکمل ہوگی۔
• مردان اور ڈی آئی خان ڈویژن میں بھی ترسیل 30 جنوری تک مکمل کی جائے گی۔

وزیر اعلیٰ نے کہا ہے کہ عوامی خدمات کی بروقت فراہمی موجودہ حکومت کی اولین ترجیح ہے اور کسی بھی قسم کی کوتاہی برداشت نہیں کی جائے گی۔