پشاور میں پاکستان مخالف بیان دینے والا افغان باشندہ گرفتار

پشاور: پاکستان کے خلاف بیان دینے والے ایک افغان باشندے کو پشاور میں گرفتار کر لیا گیا۔ پولیس کے مطابق ملزم کی پاکستان مخالف ویڈیو گزشتہ روز سوشل میڈیا پر وائرل ہوئی تھی، جس کے بعد کارروائی عمل میں لائی گئی۔

پولیس کا کہنا ہے کہ افغان شہری شاہ نواز کو داؤدزئی کے علاقے میں واقع مہاجر کیمپ خزانہ سے حراست میں لیا گیا۔ تفتیش کے دوران ملزم نے پاکستان مخالف بیان دینے کا اعتراف کیا اور اپنے عمل پر معذرت بھی کی ہے۔

پولیس کے مطابق قانونی کارروائی مکمل کرنے کے بعد ملزم کو افغانستان ڈی پورٹ کیا جائے گا۔

واضح رہے کہ حکومت پاکستان نے یکم اپریل 2025 سے غیر قانونی طور پر مقیم افغان شہریوں کے خلاف آپریشن شروع کر رکھا ہے، جس کے تحت اب تک بڑی تعداد میں افغان باشندوں کو واپس ان کے ملک بھیجا جا چکا ہے۔