پنجاب میں کائٹ فلائنگ پر پابندی برقرار،محکمہ داخلہ کا مراسلہ جاری

لاہور، حکومتِ پنجاب نے غیر قانونی پتنگ بازی پر سخت اقدامات کرنے کے لیے صوبے بھر کے کمشنرز، ڈپٹی کمشنرز، آر پی اوز، سی پی اوز اور ڈی پی اوز کو مراسلہ جاری کر دیا ہے۔ صوبائی کابینہ کے مطابق ’’کائٹ فلائنگ ریگولیشنز بل 2025‘‘ کے تحت پتنگ بازی پر مکمل پابندی ہے، جبکہ بسنت کے دوران صرف 6، 7 اور 8 فروری کو لاہور میں محدود پیمانے پر ثقافتی سرگرمی کے طور پر اجازت ہوگی۔

مراسلے میں کہا گیا ہے کہ غیر قانونی پتنگ بازی انسانی جانوں کے لیے سنگین خطرہ ہے اور راہگیروں کے زخمی ہونے کے واقعات رپورٹ ہو چکے ہیں۔ انسانی جانوں کے تحفظ کو اولین ترجیح قرار دیتے ہوئے کہا گیا کہ کسی بھی مقام پر غیر قانونی پتنگ بازی کی اجازت نہیں ہوگی۔

حکومت نے واضح کیا ہے کہ بسنت کے دوران دھاتی ڈور، تندی اور مانجھا استعمال کی کسی صورت اجازت نہیں ہوگی۔ غیر قانونی پتنگ بازی کرنے والے افراد بھاری جرمانے اور طویل قید کی سزا بھگتیں گے، جبکہ پتنگ بنانے، فروخت کرنے اور استعمال کرنے والے افراد کے خلاف بلا امتیاز کارروائی عمل میں لائی جائے گی۔

تمام اقدامات ’’کائٹ فلائنگ ریگولیشنز بل 2025‘‘ کے مطابق کیے جائیں گے اور اضلاع سے ہدایات پر عملدرآمد کی رپورٹ محکمہ داخلہ کو بھیجی جائے گی۔