وزیر داخلہ نے کرکٹ اسٹیڈیم کا ڈائزین طلب کر لیا

اسلام آباد: وفاقی وزیر داخلہ محسن نقوی نے اسلام آباد میں اسٹیٹ آف دی آرٹ کرکٹ اسٹیڈیم کا حتمی ڈائزین طلب کر لیا۔

محسن نقوی کی زیرصدارت سی ڈی اے ہیڈکوارٹرز میں اجلاس ہوا، جس میں عوام کی فلاح و بہبود سے متعلق متعدد پروجیکٹس پر پیشرفت کا جائزہ لیا گیا۔

بریفنگ میں بتایا گیا کہ اسلام آباد میں اسٹیٹ آف دی آرٹ کرکٹ اسٹیڈیم بنے گا، جس پر وزیر داخلہ نے 10 روز میں اسٹیڈیم کا حتمی ڈائزین طلب کر لیا۔

اس کے علاوہ نیشنل پارک کے لیے مخصوص ایریا مختص کرنے، اسلام آباد میں جدید طرز پر سیف سٹی پروجیکٹ کا دائرہ کار بڑھانے اور کشمیر چوک پر ٹریفک کی روانی کے لیے ‘اسمارٹ انڈر پاس’ کی تعمیر کا فیصلہ بھی کیا گیا۔

وفاقی دارالحکومت میں فائیو اسٹار ہوٹل کی تعمیر، سالڈویسٹ مینجمنٹ کمپنی کی خدمات کے لیے خصوصی ٹیم تشکیل دینے اور قانون نافذ کرنے والے اداروں کے ہیڈکوارٹر کے لیے اراضی مختص کرنے کے فیصلے بھی کیے گئے۔

اجلاس میں محسن نقوی نے 10 روز میں اسمارٹ انڈر پاس کا حتمی ڈائزین اور اسلام آباد میں خالی کمرشل پلاٹس کی تفصیلات بھی طلب کر لیں۔

وفاقی وزیر داخلہ کا کہنا تھا کہ اسلام آباد میں تجاوزات کے خلاف آپریشن پوری قوت سے جاری رہے گا اور واگزار کرائی گئی اراضی کا مفاد عامہ کے لیے بہترین استعمال کیا جائے گا۔

نئے کنونشن سینٹر کی تعمیر اور فیڈرل کانسٹیبلری، رینجرز اور اسلام آباد ٹریفک پولیس کے ہیڈکوارٹرز کے لیے اراضی مختص کرنے کے لیے مختلف تجاویز پر بھی غور کیا جا رہا ہے۔