پاکستان اور بھارت کا جوہری اور قیدی فہرست کا تبادلہ

اسلام آباد: پاکستان اور بھارت کے درمیان جوہری تنصیبات اور سہولتوں کی فہرستوں کا تبادلہ ہو گیا۔ 

ترجمان دفتر خارجہ طاہر حسین اندرابی نے ہفتہ وار پریس بریفنگ میں بتایا کہ نئے سال کے آغاز پر دونوں ممالک کے درمیان قیدیوں کی فہرستوں کا تبادلہ ہوا۔ پاکستان نے 257 بھارتی قیدیوں کی فہرست فراہم کی، جبکہ بھارتی وزارت خارجہ نے اپنی فہرست نئی دہلی میں پاکستانی ہائی کمیشن کے نمائندے کو دی۔

طاہر حسین اندرابی نے بتایا کہ پاکستان اور بھارت کے درمیان جوہری تنصیبات کی فہرست کا تبادلہ یکم جنوری کو کیا گیا۔ دونوں ممالک نے جوہری تنصیبات کی فہرستیں ایک دوسرے کے حوالے کیں۔

سفارتی ذرائع کے مطابق، جوہری تنصیبات سے متعلق معاہدے پر پاکستان اور بھارت نے 31 دسمبر 1988 کو دستخط کیے تھے، اور معاہدے کے تحت ہر سال یکم جنوری کو یہ تبادلہ کیا جاتا ہے۔

ترجمان دفتر خارجہ نے کہا کہ پاکستان یمن میں صورتحال معمول پر لانے کے لیے علاقائی کوششوں کا خیرمقدم کرتا ہے اور پُرامن حل کی حمایت کرتا ہے۔ انہوں نے کہا کہ پاکستان سعودی عرب کے ساتھ مکمل یکجہتی کا اعادہ کرتا ہے اور اسرائیل کی طرف سے صومالی لینڈ کو الگ ملک تسلیم کرنے کے اقدام کو یکسر مسترد کرتا ہے۔ پاکستان صومالیہ کی خودمختاری اور علاقائی سالمیت کی حمایت کرتا ہے۔