واہگہ بارڈرپرتوسیع شدہ نئے سٹیٹ آف دی آرٹ ایرینا کا افتتاح

پاکستان رینجرز (پنجاب)کے زیرِ اہتمام پاک ،بھارت سرحد کی جوائنٹ چیک پوسٹ واہگہ پر نو تعمیر اور توسیع شدہ سٹیٹ آف دی آرٹ ایرینا کا افتتاح کردیاگیاہے۔وزیراعلیٰ پنجاب مریم نوازشریف اس موقع پر منعقدہ تقریب کی مہمان خصوصی تھیں۔افتتاحی تقریب میں سینئر منسٹر مریم اورنگزیب، کور کمانڈر لاہور، وزرا اور سینئر بیورکریسی بھی شامل تھی۔

واہگہ بارڈرپرنئے ایرینا میں شائقین کے لیے نشستوں کی تعداد ساڑھے 7ہزار سے بڑھا کر 25ہزار کر دی گئی۔ایرینا میں توسیع کے علاوہ جوائنٹ چیک پوسٹ واہگہ پر نئی تعمیرات بھی عمل میں لائی گئی ہیں۔نئی تعمیرات میں تقسیمِ ہند کی عکاسی کرنے کے لیے ریلوے اسٹیشن کے ماڈل، سامانِ حرب اور یادگارِ شہدا پر مشتمل تھیم پارک شامل ہیں۔ایرینا میں تحریکِ آزادی سے آج تک پاکستان کی تاریخ و ثقافت سے متعلق پاکستان میوزیم بھی قائم کیا گیا۔اضافی دفاتر، پنجاب رینجرز کے جوانوں کے لیے بیرکس، نمازیوں کے لیے پریئر ایریا اور فوڈ کورٹس بھی شامل ہیں۔وسیع و عریض کار پارکنگ اور بابِ آزادی کے مقام پر شاہی قلعہ کی طرز پر عالمگیری دروازہ بھی نصب کیا گیا ہے۔

جوائنٹ چیک پوسٹ واہگہ پر نصب قومی پرچم 115 میٹر بلند تھا، اب 139میٹر کی بلندی پر لہرا رہا ہے۔اس پوسٹ پر لہرانے والا پرچم ایشیا کا ساتواں اور جنوبی ایشیا کا بلند ترین پرچم ہے۔