لاہور: نارووال پیسنجر کے اپ گریڈڈ ٹرین کا افتتاح

لاہور: پاکستان ریلوے نے ایک اور اپ گریڈڈ ٹرین کا افتتاح کیا ہے۔ لاہور ریلوے اسٹیشن پر ڈویژنل سپرنٹنڈنٹ ریلوے انعام اللہ نے افسران کے ہمراہ افتتاح کیا۔

افتتاح کے موقع پر پاکستان ریلوے کی ترقی کے لیے دعائے خیر بھی کی گئی اور ٹرین کو رنگ برنگی لڑیوں سے سجایا گیا۔ ڈی ایس ریلوے نے مختلف کوچز کا معائنہ کیا اور مسافروں سے سہولیات کے بارے میں بھی رائے لی۔

نارووال پیسنجر لاہور سے صبح 7:15 بجے روانہ ہوئی، اور بادامی باغ، شاہدرہ باغ، کالا خطائی، نارنگ، میتھہ سوجا، بدوملی، رعیہ خاص اور پیجووالی اسٹاپ کے بعد صبح 10:05 بجے نارووال پہنچے گی۔ واپسی میں شام 5 بجے روانہ ہو کر رات 7:40 بجے لاہور پہنچے گی۔

مسافروں کی سہولت کے لیے ٹرین کا دورانیہ 2 گھنٹے 40 منٹ رکھا گیا ہے۔ نارووال پیسنجر میں 10 جدید مسافر کوچز، بہترین صفائی، لائٹنگ اور دیگر آرام دہ سہولیات فراہم کی گئی ہیں۔

ڈی ایس ریلوے انعام اللہ نے کہا کہ اپ گریڈڈ نارووال پیسنجر عوام کے لیے وفاقی وزیر ریلوے کا تحفہ ہے۔ وفاقی وزیر ریلوے حنیف عباسی کے ویژن کے مطابق مسافروں کی سہولت کے لیے اقدامات جاری ہیں۔

افتتاح کے موقع پر ڈویژنل ٹرانسپورٹیشن آفیسر، ڈویژنل کمرشل آفیسر، ڈویژنل میڈیکل آفیسر، ڈویژنل مکینیکل اور الیکٹریکل انجینئرز سمیت اسٹیشن منیجر بھی موجود تھے۔