ائیر چیف ظہیر احمد بابر کی ریاض میں سعودی عسکری قیادت سے ملاقات

ریاض: پاک فضائیہ کے چیف آف ایئر اسٹاف، ائیر چیف مارشل ظہیر احمد بابر نے سعودی عرب کے دورے کے دوران سعودی عسکری قیادت سے اہم ملاقاتیں کیں، جس میں دونوں ممالک کے عسکری تعلقات اور دفاعی تعاون کو مزید مضبوط بنانے پر زور دیا گیا۔

اے سی ایس نے سعودی چیف آف جنرل اسٹاف، لیفٹیننٹ جنرل فیاض الرویلی سے ملاقات کی، جس میں علاقائی سکیورٹی اور دیگر مشترکہ چیلنجز پر تفصیلی تبادلہ خیال کیا گیا۔ سعودی جنرل نے ائیر چیف مارشل ظہیر احمد بابر کا گرمجوشی سے استقبال کیا اور پاک سعودی عسکری تعلقات کو مستحکم کرنے کی ضرورت پر زور دیا۔

اس دوران ائیر چیف مارشل ظہیر احمد بابر نے سعودی فضائیہ کے کمانڈر، لیفٹیننٹ جنرل ترکی بن بندر بن عبدالعزیز سے بھی ملاقات کی، جس میں دونوں فضائی افواج کے درمیان دوطرفہ تعاون بڑھانے پر اتفاق کیا گیا۔

ملاقات میں سعودی عرب اور پاکستان کے دیگر اعلیٰ عسکری افسران بھی شریک تھے، جنہوں نے دفاعی تعاون کو فروغ دینے کے لیے مختلف منصوبوں اور اقدامات پر تبادلہ خیال کیا۔