بنگلہ دیش کے ایئر چیف کا نیشنل ڈیفنس یونیورسٹی کا دورہ

بنگلہ دیش ایئر فورس کے سربراہ ایئر چیف مارشل حسن محمود خان نے نیشنل ڈیفنس یونیورسٹی اسلام آباد کا دورہ کیا، جہاں پاکستان اور بنگلہ دیش کے درمیان دفاعی تعاون کو مزید وسعت دینے پر زور دیا گیا۔

پاک فوج کے شعبہ تعلقات عامہ کے مطابق بنگلہ دیشی ایئر چیف نے این ڈی یو کے صدر لیفٹیننٹ جنرل بابر افتخار سے ملاقات کی۔ اس موقع پر عسکری امور، پیشہ ورانہ فوجی تعلیم اور مشترکہ تربیتی پروگرامز میں تعاون بڑھانے پر تبادلہ خیال کیا گیا۔ ایئر چیف مارشل حسن محمود خان نیشنل سکیورٹی اینڈ وار کورس 2010-11 کے سابق طالب علم بھی رہ چکے ہیں۔

ملاقات کے دوران دونوں جانب سے فوج سے فوج کے روابط کو فروغ دینے اور دفاعی تعاون کو مزید مستحکم کرنے کی اہمیت پر اتفاق کیا گیا۔ یہ دورہ پاکستان اور بنگلہ دیش کے درمیان دیرینہ دوستانہ تعلقات اور دفاعی شراکت داری کو آگے بڑھانے کے عزم کی عکاسی کرتا ہے۔

قبل ازیں بنگلہ دیش ایئر فورس کے سربراہ نے چیف آف ڈیفنس فورسز فیلڈ مارشل سید عاصم منیر سے بھی ملاقات کی۔ ملاقات میں باہمی دلچسپی کے امور، خطے کی سکیورٹی صورتحال اور دفاعی و عسکری تعاون کو مزید مضبوط بنانے کے پہلوؤں پر تفصیلی گفتگو ہوئی۔

آئی ایس پی آر کے مطابق فریقین نے مسلح افواج کے درمیان تربیتی تبادلوں، پیشہ ورانہ تعاون اور دفاعی روابط کو فروغ دینے کی ضرورت پر زور دیا۔

اس کے علاوہ بنگلہ دیشی ایئر چیف نے نیول چیف ایڈمرل نوید اشرف سے بھی ملاقات کی، جہاں پیشہ ورانہ امور، بدلتی ہوئی علاقائی سکیورٹی صورتحال اور دفاعی تعاون کے نئے امکانات کا جائزہ لیا گیا۔ دونوں ممالک کی مسلح افواج کے درمیان تعاون بڑھانے کی خواہش کا اعادہ کیا گیا۔