محسن نقوی کا پیشہ ور بھکاری مافیا اور انسانی سمگلنگ کیخلاف کریک ڈاؤن

وفاقی وزیر داخلہ محسن نقوی نے پیشہ ور بھکاری مافیا اور انسانی سمگلنگ میں ملوث عناصر کے خلاف سخت اور موثر کارروائی کے احکامات جاری کر دیے ہیں۔

ذرائع کے مطابق محسن نقوی کی زیر صدارت اہم اجلاس میں ایف آئی اے کے امیگریشن ونگ کی کارکردگی کا تفصیلی جائزہ لیا گیا اور غیر قانونی امیگریشن روکنے کی جاری مہم پر بات چیت ہوئی۔ اجلاس میں پیشہ ور بھکاری مافیا کے خلاف کارروائیوں اور ان کی پشت پناہی کرنے والوں کے خلاف اقدامات پر بھی غور کیا گیا۔

وزیر داخلہ نے کہا کہ انسانی سمگلنگ میں ملوث عناصر کسی رعایت کے مستحق نہیں ہیں اور پاکستان کے نام پر کسی بھی قسم کی بدنامی برداشت نہیں کی جائے گی۔ انہوں نے ہدایت کی کہ ایئرپورٹس پر امیگریشن چیکنگ کے نظام کو مزید مؤثر بنایا جائے اور سفری دستاویزات کی سخت جانچ کی جائے۔

اجلاس میں وفاقی سیکریٹری داخلہ، ایڈیشنل سیکریٹری داخلہ، ڈائریکٹر جنرل ایف آئی اے اور کراچی و لاہور زون کے ڈائریکٹرز نے بھی شرکت کی۔