سابق سینیٹر مشتاق احمدنے نئی سیاسی جماعت قائم کردی

سابق سینیٹر مشتاق احمد خان نے نئی سیاسی جماعت پاکستان رائٹس موومنٹ کے قیام کا باضابطہ اعلان کر دیا ہے۔

وفاقی دارالحکومت اسلام آباد میں ایک نجی ہوٹل میں تقریب سے خطاب کرتے ہوئے مشتاق احمد خان نے کہا کہ پاکستان رائٹس موومنٹ 1973 کے آئین کے اصولوں کے مطابق سیاست کرے گی اور ملک میں آئینی بالادستی کو یقینی بنانے کے لیے جدوجہد کرے گی۔ ان کا کہنا تھا کہ موجودہ نظام میں عام آدمی اپنے بنیادی حقوق سے محروم ہے، اسی لیے ان کی جماعت برابری، انصاف اور عوامی خدمت کو اپنی سیاست کا محور بنائے گی۔

سابق سینیٹر کا کہنا تھا کہ پاکستان رائٹس موومنٹ فوری اور سستا انصاف، آزادیٔ اظہار، معیاری تعلیم اور صحت کی سہولیات کی فراہمی، غربت اور کرپشن کے خاتمے، ماورائے عدالت قتل اور ملٹری آپریشنز کے خاتمے، اور وفاقی اکائیوں کے درمیان اعتماد کی بحالی کے لیے جدوجہد کرے گی۔

مشتاق احمد خان نے موجودہ پارلیمانی نظام کو جعلی قرار دیتے ہوئے کہا کہ ملک میں صحافت اور اظہارِ رائے پر پابندیاں عائد ہیں، بے روزگاری، مہنگائی، غذائی عدم تحفظ، منشیات کا پھیلاؤ، ماحولیاتی آلودگی اور کرپشن سنگین قومی مسائل کی صورت اختیار کر چکے ہیں۔