ایران کا امریکا،اسرائیل کیخلاف مزاحمت میں مرنےوالوں کیلئے سوگ کا اعلان

 تہران: ایران نے امریکا اور اسرائیل کے خلاف مزاحمت کے دوران جاں بحق ہونے والوں کی یاد میں ملک بھر میں تین روزہ سوگ منانے کا اعلان کیا ہے۔

ایرانی سرکاری میڈیا کے مطابق، ایرانی انقلاب کے حق میں آج دوپہر تہران کے انقلاب اسکوائر میں ایک بڑی عوامی ریلی بھی منعقد کی جائے گی۔

یہ اعلان ایسے وقت میں سامنے آیا ہے جب ایران میں گزشتہ دو ہفتوں سے جاری بدامنی اور احتجاجی مظاہروں کے دوران ہلاکتوں میں اضافہ ہوا ہے، جس کا الزام ایرانی حکام نے امریکا اور اسرائیل پر عائد کیا ہے۔

صدر مسعود پزشکیان نے ایرانی میڈیا سے گفتگو کرتے ہوئے کہا کہ امریکا اور اسرائیل ایران میں افراتفری اور عدم استحکام پیدا کرنے کی کوشش کر رہے ہیں اور اپنے مقاصد کے لیے ملک میں فسادات کروا رہے ہیں۔ انہوں نے عوام سے اپیل کی کہ وہ فسادی عناصر اور دہشت گردوں سے دور رہیں اور انتشار پھیلانے کی اجازت نہ دیں۔

صدر پزشکیان نے یہ بھی کہا کہ حکومت انصاف کے قیام کے لیے پرعزم ہے اور عوام کو اس پر یقین رکھنا چاہیے۔

واضح رہے کہ ایران میں 14 روز سے احتجاجی مظاہرے جاری ہیں۔ ایرانی انسانی حقوق تنظیم کے مطابق اب تک 192 افراد ہلاک ہو چکے ہیں، جبکہ امریکی انسانی حقوق تنظیم HRANA کا دعویٰ ہے کہ ہلاکتوں کی تعداد 490 تک پہنچ گئی ہے۔