بنوں میں آپریشن،پولیس چیک پوسٹ پر حملے میں 2 دہشتگرد ہلاک،2 فرار

پشاور: سی ٹی ڈی بنوں ریجن اور بنوں پولیس نے میراخیل کے علاقے میں انٹیلیجنس بیسڈ آپریشن کرتے ہوئے 2 دہشتگرد ہلاک کر دیے، جبکہ 2 دیگر فرار ہونے میں کامیاب ہو گئے۔

سی ٹی ڈی حکام کے مطابق ہلاک دہشتگردوں کی شناخت سہیل عرف سنگری اور اسماعیل عرف عثمان کے نام سے ہوئی ہے۔ یہ دونوں دہشتگرد پولیس چیک پوسٹ شیخ لنڈک اور فتح خیل پر حملوں میں ملوث تھے، جن میں 8 پولیس کانسٹیبل زخمی ہوئے تھے۔

ہلاک دہشتگرد سکیورٹی فورسز کے قافلے پر حملوں اور زیر تعمیر ریسکیو 1122 بلڈنگ میں آئی ای ڈی دھماکوں میں بھی ملوث تھے۔ ان سے 2 کلاشنکوف، پستول، متعدد کارتوس، موٹرسائیکل، موبائل فونز اور کالعدم تنظیم ٹی ٹی پی کا کارڈ برآمد ہوا۔

سی ٹی ڈی حکام نے بتایا کہ دو دہشتگرد رات کے اندھیرے کا فائدہ اٹھاتے ہوئے فرار ہوگئے۔ آئی جی خیبر پختونخوا پولیس ذوالفقار حمید اور ایڈیشنل آئی جی سی ٹی ڈی نے کامیاب کارروائی پر مقامی پولیس اور سی ٹی ڈی سپیشل ویپنز اینڈ ٹیکٹکس ٹیموں کو شاباش دی۔

آئی جی کے پی نے کہا کہ دہشتگردوں کے خلاف سینہ سپر جوان ملک عزیز صوبے کے امن و امان کا سرمایہ ہیں اور عوام کی حفاظت یقینی بنائیں گے۔