جے یو آئی (ف) کے سینئر رہنما مولانا سلیم اللہ خان ترکئی انتقال کر گئے

اسلام آباد:جمعیت علمائے اسلام (ف) کے سینئر رہنما مولانا سلیم اللہ خان ترکئی انتقال کر گئے، جس پر جماعت میں گہرے رنج و غم کی فضا چھا گئی ہے۔

مرحوم کے انتقال پر جے یو آئی (ف) کے صدر مولانا فضل الرحمان اور مرکزی ترجمان اسلم غوری نے دلی دکھ اور افسوس کا اظہار کیا۔ مرکزی میڈیا سیل سے جاری بیان میں اسلم غوری نے کہا کہ مولانا سلیم اللہ خان ترکئی کی وفات کی خبر سن کر وہ شدید رنجیدہ ہیں اور ایک باوفا، مخلص اور دلیر ساتھی سے محروم ہو گئے ہیں، جن کی کمی طویل عرصے تک محسوس کی جاتی رہے گی۔

اسلم غوری نے کہا کہ مرحوم ایک پختہ نظریاتی رہنما اور جماعت کے سنجیدہ کارکن تھے۔ ان کے ساتھ عشروں پر محیط رفاقت رہی اور وہ ہر دور میں اصولی سیاست اور نظریاتی موقف پر ثابت قدم رہے۔ انہوں نے جماعت کے لیے گراں قدر خدمات سرانجام دیں جنہیں ہمیشہ یاد رکھا جائے گا۔

ترجمان جے یو آئی (ف) نے مرحوم کی دینی، سیاسی اور سماجی خدمات کو خراجِ تحسین پیش کرتے ہوئے دعا کی کہ اللہ تعالیٰ انہیں اپنی جوارِ رحمت میں اعلیٰ مقام عطا فرمائے اور ان کی تمام خدمات کو قبول فرمائے۔

انہوں نے مرحوم کے اہل خانہ سے دلی تعزیت کا اظہار کرتے ہوئے کہا کہ جے یو آئی (ف) دکھ کی اس گھڑی میں لواحقین کے غم میں برابر کی شریک ہے۔ اسلم غوری نے دعا کی کہ اللہ تعالیٰ مرحوم کے اہل خانہ کو صبرِ جمیل عطا فرمائے اور اس عظیم صدمے کو برداشت کرنے کی توفیق دے۔