پاکستان اور ورلڈ لبرٹی فنانشل کے درمیان مفاہمتی یادداشت پر دستخط

اسلام آباد: پاکستان اور امریکا کی ڈیجیٹل فنانس کمپنی ورلڈ لبرٹی فنانشل کے درمیان مفاہمتی یادداشت پر دستخط کی تقریب منعقد ہوئی، جس میں وزیراعظم شہباز شریف اور چیف آف ڈیفنس فورسز فیلڈ مارشل سید عاصم منیر نے شرکت کی۔

وزیراعظم شہباز شریف سے ورلڈ لبرٹی فنانشل کے امریکی وفد نے ملاقات کی، جس میں نائب وزیراعظم محمد اسحاق ڈار، وزیر خزانہ محمد اورنگزیب، چیئرمین پاکستان ورچوئل اثاثہ جات ریگولیٹری اتھارٹی اور دیگر اعلیٰ حکام شریک تھے۔ وفد کی قیادت ورلڈ لبرٹی فنانشل کے چیف ایگزیکٹو آفیسر زکری وِٹکوف نے کی۔

وزیراعظم ہاؤس سے جاری اعلامیے کے مطابق وزیراعظم نے وفد کو ڈیجیٹل پاکستان کے وژن سے آگاہ کرتے ہوئے کہا کہ ڈیجیٹل کنیکٹیویٹی، شفافیت اور عوامی رسائی حکومت کی ترجیحات میں شامل ہیں، جبکہ ڈیجیٹل ادائیگیاں اور مالیاتی جدت ڈیجیٹل معیشت کی بنیاد ہیں۔

وزیراعظم کا کہنا تھا کہ پاکستان کی ڈیجیٹل مالیاتی منڈیوں میں عالمی سطح پر بڑھتی دلچسپی خوش آئند ہے اور ملک تیزی سے عالمی ڈیجیٹل فنانس کا حصہ بن رہا ہے۔

اس موقع پر ورلڈ لبرٹی فنانشل کے سی ای او نے پاکستان میں محفوظ اور شفاف ڈیجیٹل ادائیگی نظام کے فروغ کے لیے تعاون میں گہری دلچسپی کا اظہار کیا اور پاکستان کو عالمی ڈیجیٹل فنانس کے لیے ایک مضبوط امیدوار قرار دیا۔

اعلامیے کے مطابق حکومتِ پاکستان اور ایس سی فنانشل ٹیکنالوجیز ایل ایل سی کے درمیان مفاہمتی یادداشت پر دستخط کیے گئے، جس پر وزیر خزانہ محمد اورنگزیب نے حکومتِ پاکستان کی جانب سے دستخط کیے۔