الیکشن کمیشن نے 159 ارکان اسمبلی کی رکنیت معطل کر دی

اسلام آباد: الیکشن کمیشن نے مالی گوشوارے جمع نہ کروانے پر 159 ارکان پارلیمنٹ اور صوبائی اسمبلی کی رکنیت معطل کر دی اور انہیں پارلیمنٹ میں داخلے سے روک دیا۔

معطل ہونے والے ارکان میں قومی اسمبلی کے 32، پنجاب اسمبلی کے 50، سندھ اسمبلی کے 33، کے پی اسمبلی کے 28، بلوچستان اسمبلی کے 7 اور سینیٹ کے 9 ارکان شامل ہیں۔

ان میں وفاقی وزیر مصدق ملک، خالد مقبول صدیقی، ارشد وہرا، سردار اختر مینگل، سید عبدالقادر گیلانی، علی موسیٰ گیلانی، سائرہ افضل تارڑ اور مہرین رزاق بھٹو شامل ہیں۔ سینیٹ سے فوزیہ ارشد، عابد شیر علی، مراد سعید اور نور الحق قادری کی رکنیت بھی معطل کی گئی۔

واضح رہے کہ معطل ارکان اپنی رکنیت بحال ہونے تک پارلیمنٹ یا صوبائی اسمبلی کی کسی کارروائی میں حصہ نہیں لے سکتے۔ الیکشن ایکٹ کے تحت اراکین اسمبلی کو 15 جنوری تک مالی گوشوارے جمع کرانے کے پابند ہیں۔

علاوہ ازیں سپیکر قومی اسمبلی نے 32 ارکان کو اثاثہ جات کی تفصیلات جمع نہ کرانے پر ایوان میں داخلے سے روک دیا۔ سپیکر نے کہا کہ اثاثہ جات جمع نہ کروانے والے ارکان کو حاضری لگانے کی اجازت نہیں دی جائے گی اور لسٹ موجود ہے، ارکان اپنے نام چیک کر سکتے ہیں۔