قومی اسمبلی میں قائدِ حزبِ اختلاف کی تقرری کا باضابطہ نوٹیفکیشن جاری

اسپیکر قومی اسمبلی سردار ایاز صادق کی منظوری کے بعد قومی اسمبلی سیکرٹریٹ نے قائدِ حزبِ اختلاف کی تقرری کا باضابطہ نوٹیفکیشن جاری کر دیا ہے۔

ترجمان قومی اسمبلی کے مطابق اپوزیشن لیڈر کی تقرری کا نوٹیفکیشن قومی اسمبلی کے قواعد و ضوابط برائے طریقہ کار 2007 کے قاعدہ 39 کے تحت جاری کیا گیا۔

ترجمان نے بتایا کہ اسپیکر قومی اسمبلی سردار ایاز صادق نے اپوزیشن لیڈر کی تقرری کا نوٹیفکیشن اپوزیشن اراکین اسمبلی کے وفد کے حوالے کیا۔

اپوزیشن کے وفد میں اراکین قومی اسمبلی بیرسٹر گوہر علی خان، جنید اکبر، سردار لطیف کھوسہ، جمال احسن خان، شہرام ترکئی، شاندانہ گلزار، زین قریشی، علی اصغر خان، ملک امجد تاج اور یوسف خان شامل تھے۔

اس موقع پر وفاقی وزیر برائے قانون و انصاف اعظم نذیر تارڑ اور وزیر اعظم کی معاون خصوصی رومینہ خورشید عالم بھی موجود تھیں۔