محفوظ بسنت کے لیے پولیس کا 27 نکاتی سکیورٹی پلان ہائیکورٹ میں جمع

لاہور میں محفوظ بسنت کے انتظامات کے لیے پولیس نے 27 نکاتی سکیورٹی پلان لاہور ہائیکورٹ میں جمع کرادیا ہے

پولیس رپورٹ کے مطابق بسنت کے دنوں میں حکومت کی جانب سے 5 ہزار رکشے فری سروس کے لیے فراہم کیے جائیں گے۔ گزشتہ دس برسوں کے ڈیٹا کی بنیاد پر پتنگ بازی کے لیے ہاٹ سپاٹ ایریاز کا تعین کیا گیا ہے اور لاہور کو ریڈ، ییلو اور گرین زونز میں تقسیم کیا گیا ہے۔

ریڈ زونز میں بغیر انٹینا موٹر سائیکل لانے کی اجازت نہیں ہوگی اور موٹر سائیکل سواروں کے لیے دونوں افراد کے لیے ہیلمٹ لازمی ہوگا۔ بسنت کے دنوں میں چھتوں پر غیر قانونی سرگرمیوں کو روکنے کے لیے پولیس فورس تعینات ہوگی۔

پتنگ بازی کے لیے صرف منظور شدہ کاٹن کا دھاگہ استعمال کیا جا سکے گا اور کیمیکل یا دھاتی ڈور بنانے والوں کے خلاف سخت کریک ڈاؤن کیا جائے گا۔ زیادہ سرگرم علاقوں کی مانیٹرنگ ڈرون کیمروں سے کی جائے گی۔

ہنگامی حالات سے نمٹنے کے لیے کوئیک رسپانس ٹیمیں تیار رہیں گی۔ اخباروں اور سوشل میڈیا کے ذریعے کائٹ فلائنگ کے حوالے سے آگاہی مہم چلائی جائے گی جبکہ بسنت کے دنوں میں بجلی کے حادثات سے نمٹنے کے لیے لیسکو کی مکمل معاونت فراہم کی جائے گی۔