محسن نقوی کی امریکی سفیر نیٹلی بیکر سے ملاقات، سکیورٹی تعاون پر اتفاق

 

اسلام آباد: وفاقی وزیر داخلہ و نارکوٹکس کنٹرول محسن نقوی نے امریکی سفیر نیٹلی بیکر کی قیادت میں اعلیٰ سطح کے وفد سے ملاقات کی، جس میں پاک امریکہ تعلقات کو مزید مضبوط بنانے اور مشترکہ مفادات کے شعبوں میں تعاون بڑھانے پر بات چیت ہوئی۔

ملاقات میں دوطرفہ سکیورٹی تعاون، بارڈر مینجمنٹ، اور اینٹی ٹیررسٹ پروگرامز سمیت بیورو آف انٹرنیشنل نارکوٹکس اینڈ لا انفورسمنٹ کے ساتھ جاری شراکت کو مزید مضبوط بنانے پر اتفاق کیا گیا۔

محسن نقوی نے کہا کہ بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی اور ایف آئی اے، فیڈرل کانسٹیبلری اور سائبر کرائم ایجنسی کے افسران کے لیے تربیتی پروگرامز جاری رہیں گے۔

وزیر داخلہ نے مزید کہا کہ بارڈر سکیورٹی اور کوسٹل گارڈز کو جدید امریکی آلات سے لیس کیا جائے گا تاکہ ان کی استعداد کار میں اضافہ ہو اور وفاقی سطح پر پہلا اینٹی ٹیررسٹ ونگ صوبوں کے ساتھ موثر تعاون کرے۔

امریکی وفد نے پاکستان کی سکیورٹی کوششوں کو سراہا اور اعلان کیا کہ وہ دوطرفہ تعاون بڑھانے کے لیے اقدامات جاری رکھیں گے۔ ملاقات میں وزیر مملکت داخلہ، وفاقی سیکرٹری داخلہ، ڈی جی ایف آئی اے اور دیگر اعلیٰ حکام بھی موجود تھے۔