کراچی ایئرپورٹ پر سونے کی اسمگلنگ کی دو کوششیں ناکام، 10 اینٹیں برآمد

 

کراچی: جناح انٹرنیشنل ایئرپورٹ پر پاکستان کسٹمز نے کارروائی کرتے ہوئے سونے کی اسمگلنگ کی دو کوششیں ناکام بنا دیں۔ کارروائی کے دوران ایک مسافر سے 100 تولہ سونے کی 10 اینٹیں اور غیر ملکی کرنسی برآمد کر لی گئی۔

ایف بی آر کے مطابق ایئرپورٹ پر دو الگ الگ کارروائیوں میں دبئی اور استنبول جانے والے مسافروں کے سامان سے سونا اور 11 ہزار 900 امریکی ڈالر ضبط کیے گئے۔ برآمد ہونے والے سونے کی مجموعی مقدار 100 تولہ بتائی گئی ہے۔

حکام کے مطابق ضبط شدہ سونے اور غیر ملکی کرنسی کی مجموعی مالیت 5 کروڑ 6 لاکھ 82 ہزار روپے سے زائد ہے۔

کسٹمز حکام نے کسٹمز ایکٹ کے تحت مقدمات درج کر کے ملزمان کے خلاف قانونی کارروائی شروع کر دی ہے۔

ایف بی آر کا کہنا ہے کہ اسمگلنگ کی روک تھام اور قومی محاصل کے تحفظ کے لیے ایسے اقدامات مستقبل میں بھی جاری رہیں گے۔