قومی اسمبلی میں افواج پاکستان اورججزکے خلاف بات کرنے کی اجازت نہیں دوں گا، اسپیکر

 

اسپیکر قومی اسمبلی ایاز صادق نے کہا ہے کہ افوج پاکستان کےخلاف اورججوں کےکردار پر کوئی بھی بات کرے گا میں اجازت نہیں دوں گا۔

نیشنل کالج آف آرٹس (این سی اے) میں منعقدہ ڈگری شو 2025 میں شرکت کے موقع پر میڈیا سے گفتگو کرتے ہوئے انہوں نےکہا کہ قومی اسمبلی میں کوئی بھی اینٹی پاکستان بات کرے گا تو میں اس کی اجازت نہیں دوں گا،افواجِ پاکستان کے خلاف یا ججز کے کردار پر کسی قسم کی غیر مناسب گفتگو برداشت نہیں کی جائے گی۔

ایازصادق نے کہاکہ اگر کوئی رکن ٹھیک بات کرے گا تو اسے فلور ملتا رہے گا،مجھےایوان اس انداز میں چلانا ہےجس میں پاکستان کی بقا اورسلامتی کومقدم رکھاجائے،پاکستان کی خارجہ پالیسی ملکی تاریخ میں اس وقت سب سے بہتر ہے،ہمیں ہمسایہ ملک کی جانب سے دہشت گردی کا سامنا ہے ، ہر ملک میں مافیاز موجود ہوتے ہیں، ان مافیاز کےخلاف لڑنا نہ صرف حکومت بلکہ عوام کی بھی ذمہ داری ہے، کیونکہ سچ اور حق مافیاز کو آگے بڑھنے نہیں دیتا۔

بلدیاتی انتخابات سے متعلق سوال پر اسپیکرقومی اسمبلی نےکہا کہ وہ نہ حکومت میں ہیں اور نہ الیکشن کمیشن میں، اس لیے بلدیاتی انتخابات سے متعلق سوالات متعلقہ اداروں سے کیے جائیں، احتجاج کرنا سب کا حق ہے، تاہم مشورہ ہےکہ پارلیمان میں آ کر عوامی خدمت کی جائے۔