پاکستان دنیا کا تیسرا بڑا چاول برآمد کنندہ ملک بن گیا

اسلام آباد: پاکستان زرعی برآمدات میں تیز رفتار ترقی کے ساتھ عالمی سطح پر اپنے قدم مضبوط کر رہا ہے۔ بین الاقوامی جریدہ گلف نیوز نے بھی پاکستانی چاول کی عالمی سطح پر پذیرائی کو سراہا ہے۔

سال 2026 کے آغاز پر پاکستان نے ایک اور عالمی اعزاز حاصل کرتے ہوئے دنیا کا تیسرا بڑا چاول برآمد کنندہ ملک بننے کا اعزاز حاصل کیا۔ دسمبر 2025 میں پاکستانی چاول کی برآمدات میں ماہانہ 14 فیصد اضافہ ریکارڈ کیا گیا، جس نے عالمی منڈی میں شاندار کارکردگی ظاہر کی۔

خصوصاً باسمتی چاول کی برآمدات میں 50 فیصد سے زائد اضافہ پاکستان کی کامیابی میں کلیدی کردار ادا کرتا ہے۔ دسمبر 2025 میں پاکستان نے 4 لاکھ 89 ہزار ٹن چاول عالمی منڈیوں میں بھیجے، جبکہ ویتنام کی برآمدات 3 لاکھ 87 ہزار ٹن رہیں۔

پاکستان نے ویتنام پر سبقت حاصل کر کے عالمی درجہ بندی میں تیسری پوزیشن حاصل کر لی۔ پاکستانی چاول کی سب سے بڑی برآمدی مارکیٹیں متحدہ عرب امارات، چین، تنزانیہ، کینیا اور آئیوری کوسٹ ہیں۔

پاکستانی باسمتی چاول کے معیار اور مسابقتی قیمتوں نے بین الاقوامی منڈیوں میں اعتماد بڑھایا ہے۔ زرعی شعبے میں اصلاحات، عالمی منڈیوں کے اعتماد اور قومی معیشت کی مضبوط سمت نے اس کامیابی کو ممکن بنایا ہے۔