گل پلازا آتشزدگی انتہائی الم ناک اور شرم ناک سانحہ۔ مفتی تقی عثمانی۔بے لاگ تحقیقات پرزور

مفتی اعظم پاکستان ، مفتی تقی عثمانی نے سانحہ گل پلازہ کی بے لاگ تحقیقات پرزوردیاہے۔ ایک بیان میں ان کا کہناہے کہ گل پلازا کو آگ لگنے کا حادثہ پوری قوم کے لئے انتہائی المناک اور شرمناک سانحہ ہے جس کی وجہ سے پوری فضا سوگوار ہے۔ انا للہ وانا الیہ راجعون۔

تقی عثمانی نے ایکس پر پوسٹ میں لکھاہے کہ چند گھنٹوں میں کتنی جانیں بے چارگی کاشکارہوکر دنیاسے رخصت ہو گئیں اور کتنے متوسط درجے کے تاجروں کا اربوں کا نقصان انہیں قلاش بنا گیا ۔

مفتی تقی عثمانی کا مزید کہناہے کہ کراچی جیسے شہر میں آگ پر قابو نہ پاسکنا ایک افسوسناک سوالیہ نشان ہے کہ بروقت مدد کیوں نہ پہنچ سکی اس کی بے لاگ تحقیق ضروری ہے اور حفاظتی انتظامات کو تیزرفتار اور مضبوط بنانا حکومت کا فرض ہے تاہم جن لوگوں نے آخر کار انسانی جانیں بچانے کی خدمت انجام دی وہ قابل ستائش ہیں۔ اللہ تعالیٰ ان کو جزائے خیر اور شہداء کو اعلی درجات عطا فرمائیں اور آفت زدگان کو اپنی دستگیری سے نوازکر انہیں نعم البدل عطا فرمائیں۔