طاقت ورشمسی طوفان سے برطانیہ سمیت کئی ملکوں میں”آرورا”لائٹ شوکانظارہ

طاقت ورشمسی تاب کارطوفان سے برطانیہ ،روس، شمالی اٹلی، جنوبی اسپین اور فرانس میں رنگارنگ روشنیوں نے آسما ن کو منور کردیا۔یہ ناردرن لائٹ شو سورج سے زمین کی طرف ذرات آنے اور فضا میں موجود ذرات سے تعامل کرنے والے شمسی دھماکے کا نتیجہ ہے۔ناردرن لائٹس زیادہ تر آرکٹک سرکل کے قریب نظر آتی ہیں لیکن طاقت ور شمسی سرگرمیوں کے وقت دوسرے علاقوں میں بھی دیکھی جا سکتی ہیں۔

برطانوی نشریاتی ادارے کو موصول تصاویر میں پیر کی شام سکاٹ لینڈ، شمالی آئرلینڈ اور ویلز کے ساتھ ساتھ جنوب مغربی، جنوبی، مشرقی اور شمالی انگلینڈ کے کچھ حصوں میں روشنی کی شاندار تصاویر دکھائی دیتی ہیں۔

ناردرن لائٹس نے پورے برطانیہ میں آسمانوں کو سبز اور گلابی رنگوں میں منور کر دیا ہے۔

پیر کا شاندار ارورہ کورونل ماس ایجیکشن (CME) کی وجہ سے پیدا ہونے والے شدید جغرافیائی طوفان کا نتیجہ تھا – چارج شدہ ذرات کی لہریں جو سورج کی سطح سے پھوٹتی ہیں۔جیسے ہی وہ زمین کے قریب آتی ہیں،گیسوں کے ساتھ ان کے ملنے سے رنگ پیدا ہوتے ہیں۔ آکسیجن ایٹم سبز اور نائٹروجن سرخ، نیلے اور گلابی چمکتے ہیں۔

سائنس دانوں کے مطابق ،ہم اس وقت سورج کے 21 سالہ چکر کے دوران اعلی شمسی سرگرمی کے دور میں ہیں۔

شمالی اور مشرقی اسکاٹ لینڈ اور ممکنہ طور پر شمالی آئرلینڈ میں آج رات بھی یہ لائٹ شو نظرآنامتوقع ہے۔

قبل ازیں بتایاگیاتھاکہ  سورج کی طرف سے ایک طاقتور شمسی سرگرمی زمین کی طرف بڑھ رہی ہے،اس کے باعث جی پی ایس اور سیٹلائٹ مواصلات میں خلل کے علاوہ غیر متوقع علاقوں میں شاندار آرورا مناظر پیدا ہونے کا بھی امکان ہے ۔

امریکی میڈیاکے مطابق، 5میں سے 4 درجے کی شدت کا حامل شمسی تابکاری کا طوفان ہے ، امریکہ نیشنل ویدر سروس کے اسپیس ویدر پریڈکشن سینٹر( SWPC )،کے ذریعے اس کی نگرانی کی جارہی ہے۔ایس ڈبلیو پی سی کے مطابق ’’ ایس 4‘‘شدید شمسی تابکاری کا طوفان 20 سال میں سب سے بڑا ہے۔تاہم اس کے ممکنہ اثرات خلائی ، ہوا بازی، اور سیٹلائٹ آپریشن تک محدود ہیں۔

جب شمسی تابکاری کے طوفان زمین پر پہنچتے ہیں، تو وہ زمین کے نچلے مدار میں موجود خلانوردوں، جیسے بین الاقوامی خلائی اسٹیشن، اور ساتھ ہی قطبی راستوں پر سفر کرنے والی پروازوں کے لیے بھی خطرات کا باعث بن سکتے ہیں۔

ایس ڈبلیو پی سی نے ایئر لائنز، ناسا، فیڈرل ایوی ایشن ایڈمنسٹریشن، فیڈرل ایمرجنسی مینجمنٹ ایجنسی، نارتھ امریکن الیکٹرک ریلائیبلٹی کارپوریشن اور دیگر آپریٹرز کو طوفان کی تیاری کے لیے مطلع کیا ہے۔اونچے درجے کی تابکاری ان مصنوعی سیاروں کے لیے بھی خطرات پیدا کر سکتی ہے جن پر مواصلات اور نیویگیشن کے لیے انحصارکیا جاتاہے
یونیورسٹی آف کولوراڈو بولڈر میںخلائی طبیعات دان ریان فرینچ کے مطابق سیٹلائٹ آپریٹرز کو ممکنہ طور پر چوکس رہنے کی ضرورت ہوگی، لیکن عام لوگوں کے لیے وسیع اثرات کی توقع نہیں ۔

شمسی توانائی کی شدید سرگرمی آروراپیداکرنے کا سبب ہوسکتی ہے جوناردرن لائٹس یا سدرن لائٹس کہتے ہیں ۔ یہ زمین کے قطب شمالی یاجنوبی پر خوب صورت اندازمیں ظاہرہوتی ہیں۔جب توانائی بخش ذرات زمین کے مقناطیسی میدان تک پہنچتے ہیں، تو وہ فضا میں موجود گیسوں کے ساتھ مل کر آسمان میں رنگ برنگی روشنیاں پیدا کرتے ہیں۔

آرورالائٹ شوامریکہ کے شمالی نصف حصے میں، اور ممکنہ طور پر جنوب میں الاباما اور شمالی کیلیفورنیا تک دکھائی دے سکتا ہے۔