وزیراعظم ورلڈ اکنامک فورم 2026 میں شرکت کے لیے سوئٹزرلینڈ روانہ

اسلام آباد: وزیراعظم شہباز شریف ورلڈ اکنامک فورم (WEF) کی سالانہ کانفرنس 2026 میں شرکت کے لیے سوئٹزرلینڈ روانہ ہو گئے ہیں۔

وزیراعظم 19 سے 23 جنوری 2026 تک ڈایووس، سوئٹزرلینڈ میں ہونے والی کانفرنس میں حصہ لیں گے۔ ان کے ہمراہ نائب وزیراعظم و وزیر خارجہ محمد اسحاق ڈار، وزیر اقتصادی امور احد چیمہ، وزیر اطلاعات عطا اللہ تارڑ، معاون خصوصی طارق فاطمی اور دیگر اعلیٰ حکام بھی سفر کر رہے ہیں۔

دورے کے دوران وزیراعظم شہباز شریف اہم سفارتی اور اقتصادی ملاقاتیں کریں گے اور مختلف ممالک کے سربراہان اور بین الاقوامی تنظیموں کے قائدین سے دو طرفہ بات چیت کریں گے۔ دورے کا ایک اہم پہلو بزنس راؤنڈ ٹیبل ہے، جس کا مشترکہ اہتمام پاکستان اور ورلڈ اکنامک فورم کر رہے ہیں۔

اس فورم میں عالمی سطح کی بڑی کمپنیوں کے رہنما شرکت کریں گے جو پاکستان میں سرمایہ کاری کے نئے مواقع تلاش کرنے یا موجودہ سرمایہ کاری کو وسعت دینے میں دلچسپی رکھتے ہیں۔