چاندنی چوک اسٹیشن:ریسکیو 1122 کے لاکرز توڑ کر قیمتی سامان نذر آتش

چاندنی چوک اسٹیشن میں ریسکیو 1122 کے 100 سے زائد اہلکاروں کے لاکرز توڑ کر ان کا قیمتی سامان نذر آتش کر دیا گیا۔

متاثرہ اہلکاروں کے مطابق پنجاب حکومت کی جانب سے فراہم کردہ لاکرز میں ان کے ذاتی قیمتی سامان رکھے گئے تھے، لیکن انتظامیہ نے بغیر کسی پیشگی اطلاع کے تالے کاٹ کر سامان باہر پھینک دیا اور آگ لگا دی۔ اہلکاروں نے ڈسٹرکٹ آفیسر صبغت اللہ پر اختیارات سے تجاوز کا الزام عائد کرتے ہوئے وزیراعلیٰ پنجاب سے فوری نوٹس لینے کا مطالبہ کیا۔

دوسری جانب ریسکیو 1122 کے ترجمان کا کہنا ہے کہ غیر ضروری سامان جلایا گیا، ذاتی اشیاء محفوظ ہیں، اور اطلاعات تھیں کہ کچھ اہلکاروں نے غیر قانونی اشیاء لاکرز میں رکھی تھیں۔ ترجمان نے یہ بھی اعتراف کیا کہ راولپنڈی ڈسٹرکٹ آفیسر نے پیشگی اطلاع دی تھی، جو فورس تک بروقت نہیں پہنچ سکی۔