صدر نے ہائیکورٹس کے ایڈیشنل ججز کی توثیق اور توسیع کی منظوری دے دی

اسلام آباد: صدرِ مملکت آصف علی زرداری نے سندھ، لاہور اور پشاور ہائیکورٹس کے ایڈیشنل ججز کی توثیق اور مدت ملازمت میں توسیع کی منظوری دے دی ہے۔ یہ منظوری جوڈیشل کمیشن آف پاکستان کی سفارشات اور وزیراعظم کے مشورے پر دی گئی تاکہ عدالتی نظام کی مؤثر کارکردگی اور زیرِ التوا مقدمات کے بروقت فیصلے کو یقینی بنایا جا سکے۔

سندھ ہائی کورٹ کے 10 ایڈیشنل ججز کو مستقل کرنے کی منظوری دی گئی، جبکہ 2 ججز کی مدت ملازمت میں چھ ماہ کی توسیع کی گئی۔ لاہور ہائی کورٹ کے 11 ایڈیشنل ججز کو مستقل جج بنایا گیا اور ایک جج کی مدت میں 6 ماہ کی توسیع کی گئی۔ پشاور ہائی کورٹ کے 6 ایڈیشنل ججز کو مستقل کیا گیا جبکہ 4 ججز کی مدت ملازمت میں 6 ماہ کی توسیع کی گئی۔

صدر مملکت نے کہا کہ یہ اقدامات عدالتی نظام کی شفافیت اور عدالتی کارروائیوں کی بروقت انجام دہی کو یقینی بنانے کے لیے کیے گئے ہیں۔