ایران پاکستان کی مستقل اور اصولی حمایت کو ہمیشہ یاد رکھےگا،ایرانی سفیر

 

ایرانی سفیر رضا امیری مقدم نے پاکستان کی یواین انسانی حقوق کونسل میں ایران مخالف قرارداد کے خلاف ووٹ دینے پر شکریہ ادا کیا ہے۔

سفیر کے مطابق پاکستان نے قرارداد کے خلاف ووٹ دے کر ایران کے حق میں اصولی موقف اختیار کیا اور جرات مندانہ اقدام کیا۔ انہوں نے وزیراعظم شہباز شریف اور نائب وزیراعظم و وزیر خارجہ اسحاق ڈار کی قیادت میں پاکستان کے اس اصولی کردار کو قابل تحسین قرار دیا۔

ایرانی سفیر نے کہا کہ 12 روزہ جارحیت، بیرونی حمایت یافتہ ہنگامے اور عالمی اداروں کے غلط استعمال کی کوششیں ناکام ہو گئی ہیں اور ایران کے خلاف سیاسی و بلا جواز اقدامات کو تیسری مسلسل ناکامی کا سامنا کرنا پڑا۔

رضا امیری مقدم نے مزید کہا کہ پاکستان کی حمایت انصاف، انسانی حقوق، کثیرالجہتی نظام اور قومی خودمختاری سے وابستگی کی عکاس ہے، اور ایران اس اصولی و مستقل حمایت کو ہمیشہ قدر کی نگاہ سے یاد رکھے گا۔