وادی نیلم میں شدید برفباری،وادی لیپا کا رابطہ ہٹیاں بالا سے منقطع

آزاد کشمیر کی وادی نیلم میں برفباری کا سلسلہ جاری ہے جس کے باعث وادی لیپا کا زمینی رابطہ ضلعی ہیڈ کوارٹر ہٹیاں بالا سے منقطع ہو گیا۔ اس مشکل صورتحال میں پاک فوج نے فوری اور کامیاب ہیلی ریسکیو آپریشن کرتے ہوئے ایک مریضہ کو طبی پیچیدگی کی حالت میں محفوظ طریقے سے راولپنڈی ملٹری اسپتال منتقل کر دیا۔

شدید برفباری اور سرد موسم کے اثرات دیگر علاقوں میں بھی محسوس کیے جا رہے ہیں۔ استور ویلی روڈ چار دن سے بند ہے، جبکہ پاراچنار میں ناقابل برداشت سردی کی وجہ سے اہم سڑکیں بند ہیں اور بجلی کی فراہمی بھی متاثر ہے۔

پاک فوج نے متاثرہ علاقوں میں ریلیف اور امدادی سرگرمیاں جاری رکھی ہوئی ہیں تاکہ زمینی رابطہ منقطع ہونے اور شدید موسم کے اثرات کو کم کیا جا سکے۔

محکمہ موسمیات کے مطابق وادی نیلم اور دیگر پہاڑی علاقوں میں آئندہ چند روز کے دوران مزید برفباری کا امکان ہے، جس کے پیش نظر شہریوں کو محتاط رہنے کی ہدایت کی گئی ہے۔