9 مئی و دیگر کیسز:عمران خان کو عدالت یا ویڈیو لنک کے ذریعے پیش ہونے کی ہدایت

اسلام آباد: ڈسٹرکٹ اینڈ سیشن کورٹس اسلام آباد نے سابق وزیراعظم اور پی ٹی آئی کے بانی عمران خان کو 9 مئی اور دیگر پانچ مقدمات کی آئندہ سماعت پر عدالت میں یا ویڈیو لنک کے ذریعے پیش ہونے کی ہدایت کر دی۔

ایڈیشنل سیشن جج محمد افضل مجوکا کی عدالت میں سماعت کے دوران عمران خان بذریعہ ویڈیو لنک پیش نہ ہو سکے، جس کی وجہ سے ان کی ضمانت کی درخواستوں پر دلائل مکمل نہیں ہو سکے۔ عدالت نے سماعت 6 فروری تک ملتوی کر دی۔

عمران خان کے خلاف 9 مئی کے واقعات، اقدام قتل، جعلی رسیدیں اور دیگر مقدمات درج ہیں۔ اسی طرح بشریٰ بی بی کے خلاف بھی مبینہ جعلی رسیدیں جمع کروانے پر مقدمہ درج ہے۔

عدالت نے دونوں، عمران خان اور بشریٰ بی بی، کی عبوری ضمانت کی درخواستوں پر 6 فروری تک توسیع کر دی ہے۔