انجنیئر محمد علی مرزا کے خلاف گستاخی کیس،عدالت نے اٹارنی جنرل کی معاونت طلب کر لی

اسلام آباد ہائی کورٹ نے انجنیئر محمد علی مرزا کے خلاف گستاخی سے متعلق کیس میں اسلامی نظریاتی کونسل کی رائے کو معطل کرنے کے حکم میں سات اپریل تک توسیع کر دی ہے اور آئندہ سماعت پر اٹارنی جنرل سے عدالت کی معاونت طلب کر لی ہے۔

جسٹس محسن اختر کیانی کی عدالت میں اسلامی کونسل کی رائے کے خلاف اسلم خاکی کی درخواست پر سماعت ہوئی۔ دوران سماعت اٹارنی جنرل پیش نہ ہو سکے، جس پر اسسٹنٹ اٹارنی جنرل عثمان گھمن نے عدالت کو بتایا کہ اٹارنی جنرل دیگر مصروفیات کے باعث پیش نہیں ہو سکتے، تاہم عدالت چاہے تو ایڈیشنل اٹارنی جنرل پیش ہو جائیں گے۔

جسٹس محسن اختر کیانی نے ریمارکس دیے کہ آئندہ سماعت پر اٹارنی جنرل ہی پیش ہوں گے اور عدالتی معاونت فراہم کریں گے۔ عدالت نے اسسٹنٹ اٹارنی جنرل کی استدعا منظور کرتے ہوئے سماعت سات اپریل تک ملتوی کر دی۔

درخواست گزار اسلم خاکی، اسلامی نظریاتی کونسل کے وکیل اور متعلقہ حکام عدالت میں پیش ہوئے۔ درخواست گزار نے انجنیئر محمد علی مرزا کو گستاخی کا مرتکب قرار دینے والی کونسل کی رائے کو چیلنج کیا ہوا ہے۔