افغان شہری کو پاکستانی خاندان میں کیسے شامل کیا گیا؟،سندھ ہائی کورٹ برہم

 

سندھ ہائی کورٹ کے آئینی بینچ نے غیر متعلقہ شخص کو فیملی ٹری میں شامل کرنے کے خلاف درخواست کی سماعت کے دوران نادرا حکام پر سخت برہمی کا اظہار کیا۔

درخواست گزار کے وکیل کے مطابق افغان شہری کو درخواست گزار کی فیملی ٹری میں شامل کر دیا گیا، جس کے بعد پوری فیملی کے قومی شناختی کارڈز بلاک کر دیے گئے۔

جسٹس عدنان الکریم میمن نے استفسار کیا کہ افغان شہری کو پاکستانی خاندان میں کیسے شامل کیا گیا اور ایک شخص کی وجہ سے پوری فیملی کے شناختی کارڈز کیوں بلاک کر دیے گئے۔ عدالت نے حکم دیا کہ اگر کوئی غیر متعلقہ شخص فیملی میں شامل ہے تو اس کا نام فوری طور پر خارج کیا جائے۔

جسٹس ذوالفقار علی نے ریمارکس دیے کہ پیسے لے کر ہر فیملی میں کتنے افراد شامل کیے گئے  یں۔ عدالت نے نادرا کو 10 روز میں فیملی کی قانونی دستاویزات کا جائزہ لینے کا حکم دیا اور سماعت ملتوی کر دی۔