داتا دربار کے قریب سیوریج لائن میں گرنے والی 10 ماہ کی بچی کی لاش برآمد

 

لاہور کے علاقے بھاٹی گیٹ میں سیوریج لائن میں گرنے والی 10 ماہ کی بچی ردا فاطمہ کی لاش مل گئی ہے۔ ریسکیو 1122 کے مطابق بچی کی لاش آؤٹ فال روڈ پر واقع سیوریج لائن سے برآمد کی گئی۔

ریسکیو حکام کا کہنا ہے کہ واقعے کے بعد تین مختلف مقامات پر سرچ آپریشن کیا گیا، جن میں بھاٹی گیٹ، موہنی روڈ اور آؤٹ فال روڈ شامل ہیں۔ آپریشن میں ریسکیو کی 10 گاڑیاں اور 25 اہلکار شریک رہے۔

حکام کے مطابق اس افسوسناک واقعے میں پہلے ہی بچی کی والدہ کی لاش تقریباً تین کلومیٹر دور آؤٹ فال روڈ سے برآمد ہو چکی تھی۔

18 گھنٹے بعد سرچ آپریشن مکمل
10 ماہ کی بچی ردا کی نعش سگیاں کے قریب سے مل گئی۔ pic.twitter.com/zleTO16LYO

— Muhammad Umair (@MohUmair87) January 29, 2026

ادھر واقعے میں غفلت ثابت ہونے پر ٹریفک انجینئرنگ اینڈ پلاننگ ایجنسی کے پروجیکٹ ڈائریکٹر سمیت تین افسران کو معطل کر دیا گیا ہے۔

ابتدائی معلومات کے مطابق متاثرہ خاندان شورکوٹ سے سیر کے لیے لاہور آیا تھا۔ مینارِ پاکستان کے بعد خاندان داتا دربار پہنچا جہاں خاتون اپنی بچی کے ہمراہ سیوریج لائن کی منڈھیر پر بیٹھی تھیں کہ اچانک دونوں نیچے گر گئیں۔

وزیر اعلیٰ پنجاب مریم نواز نے واقعے کا نوٹس لیتے ہوئے ایڈیشنل چیف سیکریٹری کی سربراہی میں تحقیقاتی کمیٹی قائم کر دی ہے، جو 24 گھنٹوں میں اپنی رپورٹ پیش کرے گی۔