کراچی:سولجر بازار میں گیس دھماکہ،چھت گرنے سے 10 جاں بحق،13 زخمی

کراچی کے علاقے گل رعنا کالونی سولجر بازار میں گیس لیکیج کے باعث دھماکے سے ایک تین منزلہ رہائشی عمارت کی چھت گر گئی، جس کے نتیجے میں 10 افراد جاں بحق اور 13 زخمی ہو گئے۔

حادثہ گلی نمبر 05 کے قریب آغا خان اسکول کے علاقے میں پیش آیا، جس کی اطلاع ملتے ہی امدادی ادارے جائے وقوعہ پر پہنچ گئے۔ ایدھی فاؤنڈیشن کی ایمبولینسز اور رضا کار زخمیوں کو فوری طور پر سول ہسپتال منتقل کرنے میں سرگرم عمل رہے، جہاں انہیں طبی امداد فراہم کی جا رہی ہے۔

ریسکیو ذرائع کے مطابق جاں بحق افراد میں 60 سالہ محمد ریاض اور 10 سالہ نازیہ شامل ہیں، جبکہ ایک اور شخص کی شناخت عمل میں ہے۔ زخمیوں میں 6 سالہ زین العابدین، 40 سالہ کامران، 50 سالہ وکیہ، 14 سالہ بلاول، 8 سالہ بھورا، 6 سالہ عدنان، 6 سالہ ریاض، 25 سالہ تسلیم، 8 سالہ سبحان اور 60 سالہ محمد شاہد شامل ہیں۔

عینی شاہدین نے بتایا کہ دھماکے کی شدت اتنی زیادہ تھی کہ آس پاس کی عمارتیں بھی لرز گئیں اور علاقے میں خوف و ہراس پھیل گیا۔ حکام نے شہریوں سے کہا ہے کہ وہ جائے وقوعہ سے دور رہیں تاکہ امدادی کارروائیاں متاثر نہ ہوں۔

ڈپٹی کمشنر ایسٹ نصر اللہ عباسی کے مطابق عمارت کے ملبے میں مزید دو افراد کے دبے ہونے کا خدشہ ہے۔ انہوں نے بتایا کہ سلنڈر دھماکے کی شدت سے عمارت متاثر ہوئی اور زمین بوس ہو گئی، جبکہ تنگ گلیوں کی وجہ سے ریسکیو آپریشن میں مشکلات پیش آ رہی ہیں۔