عمران خان کا پمز میں فالو اپ طبی معائنہ۔ آنکھ کے علاج کا دوسرا انجیکشن دیا گیا
تحریک انصاف کے بانی عمران خان کو گزشتہ شب ایک بار پھر پمز ہسپتال لایا گیا ؛ ان کو فالو اپ انجکشن لگایا گیا، ان کی طبی حالت مکمل تسلی بخش رہی، اس وزٹ کے بعد ان کو ڈسچارج کر دیا گیا۔
ایگزیکٹو ڈائریکٹر پمز کی طرف سے جاری ہینڈ آؤٹ کے مطابق جناب عمران احمد خان نیازی ولد اکرام اللہ خان نیازی، جن کی عمر 74 سال ہے، 24 فروری 2026 کو پمز (PIMS) ہسپتال میں آنکھوں کے علاج کے سلسلے میں فالو اپ یعنی ‘اینٹی وی ای جی ایف’ (Anti-VEGF) انٹرا وٹریل انجکشن کی دوسری خوراک کے لیے لائے گئے۔
طبی طریقہ کار سے قبل ماہرین کے ایک بورڈ نے ان کا معائنہ کیا: جس میں کنسلٹنٹ کارڈیالوجسٹ (ماہرِ امراضِ قلب) نے ان کا ایکو کارڈیوگرافی اور ای سی جی (ECG) ٹیسٹ کیا (جس کے نتائج نارمل رہے) اور کنسلٹنٹ فزیشن نے بھی معائنہ کیا۔ جناب عمران خان طبی لحاظ سے مستحکم پائے گئے۔
باقاعدہ رضامندی حاصل کرنے کے بعد، اور آپریشن تھیٹر میں معیاری نگرانی، احتیاطی تدابیر اور پروٹوکول کے تحت، پمز اور الشفاء آئی ہسپتال کے کنسلٹنٹ آپتھلمولوجسٹ (ماہرِ چشم) اور کنسلٹنٹ وٹریو ریٹینل سرجن کی زیرِ نگرانی مائکروسکوپی کی مدد سے انہیں ‘اینٹی وی ای جی ایف’ انٹرا وٹریل انجکشن کی دوسری خوراک لگائی گئی۔ یہ طریقہ کار ‘ڈے کیئر سرجری’ (جس میں مریض کو رات بھر ہسپتال رکنا نہیں پڑتا) کے طور پر انجام دیا گیا۔
پمز اعلامیہ میں مزید کہا گیا کہ ہسپتال میں قیام کے دوران، وہ انجکشن سے پہلے، اس کے دوران اور بعد میں مکمل طور پر مستحکم رہے۔ انہیں دیکھ بھال کی ہدایات، فالو اپ مشورے اور متعلقہ دستاویزات دے کر ہسپتال سے فارغ کر دیا گیا۔