دبئی میں دھماکوں کی آوازیں۔ آگ لگنے سے شہر کی فضا دھوئیں سے بھر گئی
اردگرد موجود لوگ آگ سے اٹھنے والے دھوئیں کو دیکھنے کے لیے جمع ہوگئے
دبئی کے کاروباری علاقے پر جمعہ 13 مارچ کی صبح دھواں اٹھ رہا ہے
سعودی وزارت دفاع کے ترجمان نے اپنے بیان میں کہا ہے کہ ملک کی فضائی دفاع نے مزید آٹھ ڈرونز گرا دیے ہیں۔
بیان میں کہا گیا کہ صوبہ الخرج اور ریاض کے علاوہ یہ ڈرون وسطی اور مشرقی علاقوں میں مار گرائے گئے ہیں۔
یاد رہے کہ اس سے قبل سعودی وزارت دفاع نے اطلاع دی تھی کہ حملوں کی نئی لہر میں 14 ڈرونز کو روک کر تباہ کر دیا گیا ہے جبکہ اس کے بعد مزید آٹھ ڈرونز کے تباہ کرنے کا بیان سامنے آیا ہے۔
جمعہ کی صبح دبئی میں دھماکوں کی اطلاعات کے بعد شہر کی فضا میں خوف و ہراس پھیل گیا، جبکہ آگ لگنے کے باعث گہرا سیاہ دھواں بلند عمارتوں کے اوپر تک پھیل گیا۔ حکام کے مطابق آگ شہر کے ایک صنعتی علاقے میں لگی۔
غیر ملکی خبر رساں ادارے کے مطابق دبئی کے علاقے الکوز (Al Quoz) میں آگ بھڑکتی دیکھی گئی۔ اردگرد موجود لوگ آگ سے اٹھنے والے دھوئیں کو دیکھنے کے لیے جمع ہوگئے۔
پولیس نے غیر ملکی صحافی کو آگ کے مقام کے قریب جانے سے روک دیا۔ آگ ایک بند گلی (cul-de-sac) میں لگی تھی۔
دبئی میڈیا آفس، جو حکومت کی جانب سے بیانات جاری کرتا ہے، نے سوشل میڈیا پلیٹ فارم ایکس (X) پر بتایا کہ کامیاب دفاعی کارروائی کے بعد گرنے والے ملبے سے مرکزی دبئی میں ایک عمارت کے بیرونی حصے پر معمولی واقعہ پیش آیا۔
حکام کے مطابق اس واقعے میں کوئی جانی نقصان نہیں ہوا، تاہم سیاہ دھواں اتنا زیادہ تھا کہ وہ شہر کے مشہور لگژری ہوٹل برج العرب تک آسمان میں پھیلتا ہوا نظر آیا۔