روم کی سڑکوں پر اسرائیلی اورفلسطینی مائوں کا امن کے لیے ننگے پائوں مارچ

اٹلی کے دارالحکومت روم کی سڑکوں پر ایک منفرد اور جذباتی مارچ میں اسرائیلی اور فلسطینی مائیں ہاتھ میں ہاتھ ڈالےننگے پاؤںچلتی رہیں۔ یہ امن کے لیے ماوں کی برہنہ پا واک نامی مہم کا حصہ تھا، جس کا مقصد غزہ اور دیگر علاقوں میں جاری تشدد کا خاتمہ اور بچوں کی حفاظت یقینی بنانا ہے۔

مارچ اسرائیلی تنظیم ویمن ویج پیس اور فلسطینی تنظیم ویمن آف داسن کے تحت کیاگیا۔ صدیوں سے دونوں طرف کی مائیں اپنے بچوں کی موت پر سوگ مناتی رہی ہیں اور اب وہ ایک ساتھ کھڑی ہو کر امن کی آواز بلند کر رہی ہیں۔ مارچ میں سینکڑوں خواتین نے حصہ لیا، جن میں بین الاقوامی حامی بھی شامل تھے۔ شرکاء نے بچوں کی حفاظت، وقار اور خوف سے پاک مستقبل کا مطالبہ کیا۔

اسرائیلی رہنما یائل ایڈمی نے کہا: “مائیں چاہتی ہیں کہ ان کے بچے نہ مریں۔ بس یہی بات ہے۔” فلسطینی رہنما ریم الحجاجرہ سمیت دیگر خواتین نے بھی اسے ایک طاقتور پیغام قرار دیا کہ امن حکومتوں سے نہیں بلکہ عوام، خاص طور پر ماؤں سے بنتا ہے۔

A Palestinian mother and an Israeli mother, hand in hand, lead dozens of women BAREFOOT through the streets of Rome, calling for peace pic.twitter.com/1UTR9NxP4l

— RT (@RT_com) March 25, 2026

یہ مارچ روم کے علاوہ یروشلم اور دنیا کے دیگر شہروں میں بھی بیک وقت منعقد کیا گیا۔ مہم کا مقصد یہ بتانا ہے کہ مائیں امن عمل میں مرکزی کردار ادا کر سکتی ہیں اور تشدد کے چکر کو توڑا جا سکتا ہے۔

یہ اقدام  مدر کال نامی عالمی اتحاد کا آغاز ہے، جو فلسطینی اور اسرائیلی خواتین کی مشترکہ کاوش ہے۔ شرکاء نے ننگے پاؤں چل کر بچوں کی کمزوری اور بے بسی کی علامت بنائی۔

آن لائن ردعمل مخلوط رہا۔ کچھ لوگوں نے اسے انسانی پیغام اور امن کی امید قرار دیا، جبکہ دیگر نے اسے محض سیاسی کارروائی قرار دیا۔ تاہم، یہ مارچ دونوں طرف کی ماؤں کی مشترکہ تکلیف اور امن کی خواہش کو اجاگر کرتا ہے۔

یہ مہم جاری رہے گی اور دنیا بھر میں مزید ایسے مارچز کا انعقاد کیا جائے گا تاکہ ماؤں کی آواز کو امن عمل میں شامل کیا جائے۔